Android əməliyyat sistemində (ƏS) yeni dəyişikliklərə əsasən, sürətli enerji doldurma funksiyasından istifadə etmək üçün smartfonun blokdan çıxarılması tələb olunacaq. Bu barədə Android Authority nəşri məlumat yayıb. Android 16-nın beta versiyalarından birində bu yeniliyi mütəxəssis Mişaal Rəhman aşkar edib. O bildirib ki, "USB üçün Əlavə Müdafiə" (Advanced Protection for USB) funksiyası naməlum mənbələrdən cihazlara qoşulmanı bloklamaqla yanaşı, sürətli enerji doldurma funksiyasına da təsir edəcək. Rəhman izah edib ki, Android 16-da enerji adapterinə qoşulan telefon standart olaraq minimum güclə enerji yığacaq. Sürətli enerji doldurmanı aktivləşdirmək üçün smartfonun blokdan çıxarılması tələb olunacaq. Çox güman ki, cihaz kabel vasitəsilə qoşulduqda ekranda blokdan çıxarma tələbi barədə xəbərdarlıq görünəcək. Lakin cihazın bütün enerji doldurma prosesi ərzində blokdan çıxarılmış vəziyyətdə qalması ehtimal olunmur. Android Authority mütəxəssisləri qeyd edib ki, bu yenilik "USB üçün Əlavə Müdafiə" funksiyasının yan təsiri kimi meydana gəlib. Bu funksiya aktiv olduqda kabel vasitəsilə məlumat ötürülməsi aparat səviyyəsində bloklanır. Bununla Android cihazları USB zəifliklərindən istifadə edilərək həyata keçirilən hücumlardan qoruyur. Daha öncə təhlükəsizlik mütəxəssisləri bildiriblər ki, iş elanlarından istifadə edərək cihazlara virus yoluxdurmaq üçün fırıldaqçılar tərəfindən hücumlar təşkil olunur. Virus vasitəsilə cinayətkarlar SMS mesajları və push bildirişlərini ələ keçirə, həmçinin bank kartı məlumatlarını oğurlaya bilərlər.