Amerikanın Apple şirkəti 3 milyardıncı iPhone modelini satdığını elan edib. Bu barədə Tim Kukun açıqlamasına istinadən 9to5Mac xəbər verib, Day.Az isə məlumatı Lenta.ru-dan götürərək yayıb. Şirkətin 2025-ci maliyyə ilinin üçüncü rübü ilə bağlı təqdim etdiyi hesabatda, Kuk iPhone satışlarının yüksək gəlir gətirdiyini vurğulayıb. O, eyni zamanda, 2007-ci ildən bəri satılan iPhone-ların sayının 3 milyarda çatdığını qeyd edib. İlk iPhone-un bazara çıxmasından sonra Apple 2016-cı ilin iyul ayında 1 milyard iPhone satışını qeyd etmişdi. Həmin vaxt Tim Kuk iPhone-u "dünyanı dəyişən ən mühüm və uğurlu məhsullardan biri" kimi təsvir etmişdi. 9to5Mac-in mütəxəssisləri Apple-ın bu nailiyyətini diqqətəlayiq hesab edirlər, baxmayaraq ki, şirkət satış rəqəmlərini açıqlamağı adətən sevmir. Xatırladaq ki, 2018-ci ilin noyabr ayında Apple-ın maliyyə direktoru Luka Maestri, bir rüb ərzində satılan cihazların sayının biznesin real vəziyyətini əks etdirmədiyini bildirmişdi.