Apple şirkəti ABŞ-da daha 100 milyard dollar sərmayə yatıracağını elan edib. Bu qərar texnologiya nəhənginin ABŞ prezidenti Donald Trampın təzyiqləri ilə üzləşdiyi bir vaxtda qəbul edilib. Ağ Evdən verilən məlumata görə, bu vəsait ABŞ-da daha çox Apple məhsul hissələrinin istehsalını stimullaşdırmaq üçün istifadə ediləcək və şirkətin daha əvvəl dörd il ərzində ABŞ-a 500 milyard dollar sərmayə qoymaq barədə verdiyi vədlərə əlavə ediləcək.

Tramp bu ilin əvvəlində Apple şirkətini ad çəkərək hədəfə almış və əgər iPhone istehsalını ABŞ-a köçürməsə, məhsullarına tarifləri artırmaqla hədələmişdi. Apple-ın baş direktoru Tim Kuk keçən həftə əvvəlki öhdəliklərini xatırladaraq, şirkətin "daha çox iş görmək" istədiyini bildirmişdi. Bu, məhsullarına tətbiq ediləcək tariflərdən yayınmaq cəhdi kimi qiymətləndirilib.

Çərşənbə günü Ağ Evdə keçirilən rəsmi tədbirdə Tramp, Apple-ın yeni sərmayəsinin ABŞ-ın daxili təchizat zəncirinə böyük təsir göstərəcəyini bildirib. Bu sərmayə çərçivəsində ölkə daxilində yeni məlumat mərkəzləri yaradılacaq və Kentukkidə, Harrisburqda iPhone və ağıllı saatlar üçün istifadə ediləcək ağıllı şüşə istehsal xətti qurulacaq.

Tramp Apple-ın istehsalı ABŞ-a köçürməsini alqışlayaraq, bu addımın planlaşdırılan 100%-lik çip və yarımkeçirici tariflərindən yayınmasına imkan yaratdığını vurğulayıb. O, digər şirkətlərin də ABŞ-a sərmayə qoyacağı təqdirdə bu cür güzəştlərdən faydalana biləcəyini qeyd edib.

Apple-ın baş direktoru Tim Kuk isə şirkətin ilkin 500 milyard dollarlıq sərmayəsinin "artıq nəticələr verdiyini" bildirib. O, yeni vəsaitin "daha çox istehsala təkan verəcəyini" və Apple məhsullarının tərkib hissələrinin dünya üzrə istehsalı üçün əhəmiyyətli olacağını vurğulayıb.

Analitiklər Apple-ın təchizat zəncirində ciddi dəyişikliklərin vaxt tələb edəcəyini bildiriblər. Lakin şirkətin vəd etdiyi sərmayə, Tramp administrasiyasının diqqətini cəlb edərək, Apple-a qarşı daha yüngül davranışla nəticələnə bilər.

Ağ Evin bəyanatında isə bu addımın Trampın siyasətlərinin şirkətləri ABŞ-a daha çox sərmayə qoymağa təşviq etdiyini göstərdiyi bildirilib. "Bu gün Apple ilə bağlı açıqlama istehsalat sənayemiz üçün daha bir qələbədir və iqtisadi və milli təhlükəsizliyimizi qorumaq üçün kritik komponentlərin istehsalını yenidən ölkəyə qaytarmağa kömək edəcək," deyə Ağ Evin sözçüsü bildirib.

Apple uzun müddətdir ki, məhsullarının böyük hissəsini Çində istehsal edir. Lakin Trampın ilk dövründə ABŞ-a daha çox sərmayə qoymaqla tariflərdən yayınmağa nail olmuşdu. Bu ilin yanvarında Tramp yeni tarif müharibəsinə başlayaraq, Çində istehsal olunan mallara əlavə 30% rüsum tətbiq etmişdi. Apple isə tədarük zəncirini yenidən quraraq, mallarını əsasən Hindistan və Vyetnamdan ABŞ-a göndərməyə başlamışdı.

Buna baxmayaraq, şirkət son üç ayda tariflərə görə 800 milyon dollardan çox sərhəd vergisi ödəyib və yaxın aylarda daha 1,1 milyard dollar ödəyəcəyini gözləyir. Hindistanda istehsal olunan məhsullara tariflərin 50%-ə qədər artacağı ilə bağlı xəbərlər isə narahatlıq yaradıb.

Apple-ın baş direktoru Tim Kuk investorlarla keçirilən telefon görüşündə, şirkətin ABŞ-dakı fəaliyyətinə və "üçüncü tərəflərlə" əməkdaşlıq edərək sərmayə qoymaq strategiyasına diqqət çəkib. O, Michigan ştatında "istehsalat akademiyası" açmaq planlarını və nadir torpaq maqnitlərinin istehsalı üçün MP Materials şirkətindən 500 milyon dollarlıq alış öhdəliyini xatırladıb.

Analitiklər Apple-ın ABŞ-a istehsalın tam köçürülməsinin qısa müddətdə mümkün olmadığını bildirir. Lakin bu sərmayənin şirkətin məhsullarının müxtəlif tərkib hissələrinin istehsalına necə təsir göstərəcəyi hələlik aydın deyil.