Apple şirkəti ağıllı evlər üçün nəzərdə tutulmuş müşahidə kamerası hazırlamağa başlayıb. Bu kamera şirkətin Home adlı tətbiqinə inteqrasiya ediləcək. Bu barədə Bloomberg nəşri məlumat yayıb.

Bildirilir ki, yeni cihazın 2026-cı ildə təqdim olunması və ya ağıllı evlər üçün idarəetmə mərkəzinin buraxılışı ilə birlikdə bazara çıxarılması gözlənilir. Lakin dəqiq buraxılış tarixi hələlik bəlli deyil.

Kameranın əsas xüsusiyyətlərindən biri onun batareya ömrünün uzunluğu olacaq. Belə ki, batareya bir neçə ay və ya bir il müddətində işləyə biləcək. Standart təhlükəsizlik funksiyalarına əlavə olaraq, cihaz insan və hərəkəti aşkar etmək kimi xüsusiyyətlərə malik olacaq. Bu isə Home ekosistemində geniş avtomatlaşdırma ssenarilərinin həyata keçirilməsinə imkan yaradacaq.

Bloomberg-in məlumatına görə, kamera üz tanıma funksiyası və infraqırmızı sensorlarla təchiz ediləcək. Bu, cihazın otaqda olan şəxsləri dəqiq müəyyən etməsinə şərait yaradacaq. Apple hesab edir ki, istifadəçilər bu cür kameraları evin müxtəlif yerlərində yerləşdirərək gündəlik işlərini optimallaşdıra bilərlər. Məsələn, sistem otaqdan kimsə çıxdıqda işıqları avtomatik söndürə bilər və ya ailə üzvlərindən birinin otağa daxil olduğunu müəyyən edərək onun sevdiyi musiqini səsləndirə bilər.

Bununla yanaşı, Apple ev təhlükəsizliyi üçün bir neçə növ kamera və digər məhsullar üzərində də işləyir. Buraya üz tanıma funksiyası ilə qapının kilidini açmağa imkan verən qapı zəngi də daxildir. Bu addımlar Apple-ın ağıllı evlər bazarında öz mövqeyini gücləndirmək və Amazon-un Ring markası, eləcə də Google-un Nest məhsulları kimi rəqiblərə meydan oxumaq istədiyini göstərir.

Qeyd edək ki, Apple-ın HomeKit platforması artıq digər istehsalçıların kameralarını dəstəkləyir.