Atlantikdə 7000 illik sirli divar: Tarixi yenidən yazacaq kəşf

Qədim divar: 7000 illik sirr

Fransız arxeoloqlar Breton sahillərində, Atlantik okeanının dərinliklərində 7000 il yaşı olan qədim divar tapıblar. Bu divar, təxminən 120 metr uzunluğunda olub, granitdən hazırlanıb. Geoloq Yves Fouquet tapıntını ilk gördüyündə xəritədəki bir səhv olduğunu düşünmüşdü. Lakin lazer texnologiyası ilə aşkar edilən bu strukturlar daha sonra 60 dalğıc araşdırması ilə təsdiqləndi.

Texniki bacarıqlar və sosial təşkilat

Tədqiqatçılar bu divarı eramızdan əvvəl 5800–5300-cü illərə aid edirlər. Alimlər, bu qədər qədim bir dövrdə insanların tonlarla ağırlığı olan daşları kəsib, daşıyıb və qurma bacarığına malik olduğunu vurğulayırlar. Bu tapıntı, o dövrün yüksək texniki bacarıqlarını və sosial təşkilatını göstərir. Arxeoloq Yvan Pailler qeyd edir: 'Bu, sualtı arxeologiyada yeni perspektivlər açır və sahil əhalisinin necə təşkil olunduğunu daha yaxşı anlamağa kömək edir.'

Çətin şəraitdə qorunan tarix

Divar, hazırda dəniz səviyyəsindən 9 metr aşağıda yerləşir. Lakin o dövrdə dəniz səviyyəsi daha aşağı olub. Strukturların qorunmuş vəziyyətdə qalması alimləri heyrətləndirib. Fouquet deyir: 'Bu, fırtınalar, dalğalar və güclü axınların olduğu bir mühitdə yüksək texniki bacarıqların mövcudluğunu sübut edir.'

Tapıntının məqsədi

Divarın məqsədi hələ də tam məlum deyil. Alimlər onun dənizdən qorunmaq üçün müdafiə divarı, balıqçılıq üçün konstruksiya və ya ovlamaq üçün bir tələ ola biləcəyini düşünürlər. Divarın unikallığı Fransada bu dövrə aid başqa heç bir oxşar strukturun tapılmaması ilə daha da ön plana çıxır.

İnsan tarixini yenidən yazan kəşf

Bu tapıntı, Breton sahillərindəki məşhur Menhir və Dolmen daşlarından daha qədimdir. Onlar eramızdan əvvəl təxminən 4500-cü ilə aid olsa da, yeni tapılan divar bu tarixi daha da geriyə çəkir. Alimlər bu kəşfi, qədim insanların həyat tərzi və təşkilatını daha yaxşı anlamaq üçün mühüm bir addım kimi qiymətləndirirlər.