Azərbaycanda yaşıl enerji nəqliyyatı sahəsində mühüm irəliləyişlər müşahidə olunur. Son illərdə hibrid və elektrik avtomobillərin sayı 20-30 dəfə artıb. Bu barədə IFC-nin Davamlı Maliyyə üzrə Eksperti Leyla Hüseynli “Azərbaycan və Mərkəzi Asiya Yaşıl Enerji Həftəsi” tədbirində məlumat verib.

Dövlət dəstəyi və özəl maliyyələşmə

Leyla Hüseynlinin sözlərinə görə, bu artımın əsas səbəbləri arasında vergi və gömrük güzəştləri, həmçinin hökumətin təşviq proqramları ilə özəl maliyyə imkanlarının uğurlu birləşməsi yer alır. Hüseynli qeyd edib ki, yaşıl enerji sahəsində daha geniş transformasiya üçün həm hökumət, həm də özəl sektor tərəfindən ciddi investisiyalar tələb olunur.

Yaşıl binalara keçid

Hüseynli ənənəvi yaşayış fondunun “yaşıl” binalara çevrilməsinin də mühüm bir proses olduğunu vurğulayıb. Bu məqsədə nail olmaq üçün hökumət tərəfindən islahatlar və təşviqlər vacibdir. Onsuz, bu keçid çox çətin olur. IFC-nin nümayəndəsi qeyd edib ki, yaşıl binaların sertifikasiyasını daha fəal şəkildə tətbiq etmək üçün müxtəlif regionlarda həm fiskal, həm də qeyri-fiskal təşviqlərdən istifadə olunur. Bunlara vergi güzəştləri, faiz dərəcəsi subsidiyaları və risklərin bölüşdürülməsi mexanizmləri daxildir.

Beynəlxalq təcrübədən istifadə

Hüseynli bildirib ki, bütün ölkələr üçün universal bir həll mövcud deyil. Hər bir ölkə beynəlxalq təcrübəyə əsaslanaraq öz spesifik alətlər dəstini inkişaf etdirməlidir. IFC-nin global təşkilat olaraq bu sahədə müxtəlif yanaşmaları müşahidə etdiyini və bu yanaşmaların yaşıl enerji təşəbbüslərinin həyata keçirilməsinə böyük töhfə verdiyini vurğulayıb.