Azərbaycanlı tələbələr Çində “Huawei” şirkətinin təşkil etdiyi “Gələcəyin Toxumları” (Seeds for the Future) proqramı çərçivəsində Yay Düşərgəsində iştirak edəcəklər. Bu proqramın qalibləri ilə Rəqəmsal İnkişaf və Nəqliyyat Nazirliyində görüş keçirilib. Görüşdə “Huawei” şirkətinin Yaxın Şərq və Mərkəzi Asiya ölkələri üzrə vitse-prezidenti Angela Lin də iştirak edib.

Yolasalma mərasimində çıxış edən rəqəmsal inkişaf və nəqliyyat nazirinin müavini Samir Məmmədov tələbələrə uğurlar arzulayıb. O bildirib ki, gənclərin informasiya-kommunikasiya texnologiyaları (İKT) üzrə təlimlərdə iştirakı onlara sənaye innovasiyalarını daha yaxşı anlamaq və sahibkarlıq ruhunu inkişaf etdirmək imkanı verəcək. Tələbələr “Huawei” şirkətinin Baş ofisi və Tədqiqat və İnkişaf Mərkəzinə səfər edərək İKT sahəsində biliklərini artıracaq.

Nazir müavini əlavə edib ki, Azərbaycan hökuməti rəqəmsal sahənin modernləşdirilməsi üçün mühüm təşəbbüslər həyata keçirir. Xüsusilə, 2025–2028-ci illər üçün qəbul edilən Süni İntellekt Strategiyası ölkədə rəqəmsal inkişafı dəstəkləmək və Azərbaycanın qlobal süni intellekt ekosistemindəki mövqeyini gücləndirmək məqsədi daşıyır. Həmçinin, süni intellekt sahəsində istedadların inkişafı üçün Süni İntellekt Akademiyasının yaradılması planlaşdırılır.

Gələcəkdə Azərbaycanda “Huawei” ilə birgə Təlim Mərkəzinin yaradılması üzrə əməkdaşlıq təklif olunub. Bu layihə ölkədə rəqəmsal sahədə mütəxəssislərin hazırlanmasında mühüm rol oynaya bilər.

Xatırladaq ki, “Huawei” şirkəti və İnnovasiya və Rəqəmsal İnkişaf Agentliyi (İRİA) arasında əməkdaşlıq çərçivəsində indiyədək bir sıra uğurlu layihələr həyata keçirilib. Bu layihələrə azərbaycanlı tələbə və mütəxəssislərin Çində təlimlərdə iştirakı, “Gələcəyin Toxumları” proqramı çərçivəsində innovativ layihələrin və startapların maliyyələşdirilməsi daxildir.