Aztelekom MMC, Azərbaycanın işğaldan azad edilmiş ərazilərində yenidənqurma işləri çərçivəsində müasir telekommunikasiya xidmətlərinin inkişafını təmin etmək üçün mühüm addımlar atır. Şirkət bu ərazilərdə yaşayan sakinlərə və biznes obyektlərinə yüksək sürətli internet təqdim etmək məqsədilə GPON (Gigabit Passiv Optik Şəbəkə) texnologiyasından istifadə edir. Bu barədə Aztelekom MMC-nin Trend-ə verdiyi açıqlamada bildirilib.

Aztelekom müxtəlif xidmət paketləri təqdim edir. Bunlara “internet + telefon”, “internet + televiziya (iki-birində)” və “internet + telefon + televiziya (üç-birində)” xidmət paketləri daxildir. Şirkətin məlumatına görə, təqdim edilən xidmətlər yalnız bölgə sakinlərinin həyat keyfiyyətini artırmaqla məhdudlaşmır, eyni zamanda sosial-iqtisadi inkişaf layihələrinin həyata keçirilməsinə dəstək verir.

2025-ci il iyul ayının 31-nə olan məlumata əsasən, işğaldan azad edilmiş ərazilərdə artıq 5000-dən çox abunəçi Aztelekom-un xidmətlərindən yararlanır. Müştərilər öz tələblərinə uyğun olaraq həm telefon rabitəsi, həm də IP televiziya xidmətlərindən istifadə edə bilirlər.

Qeyd edək ki, cənab prezident İlham Əliyevin fərmanı ilə təsdiq edilmiş “Azərbaycan Respublikasının azad edilmiş ərazilərinə Böyük Qayıdış üzrə Birinci Dövlət Proqramı” çərçivəsində telekommunikasiya sektorunun inkişafı əsas prioritetlərdən biri kimi müəyyən edilib. Bu proqram, bölgədə infrastrukturun inkişafını sürətləndirmək və sakinlərin müasir texnologiyalara çıxışını təmin etmək məqsədini daşıyır.