Böyük Britaniya Müdafiə Nazirliyi pilotsuz kəşfiyyat aerostatlarının hazırlanması üzərində çalışır. Bu barədə ölkənin Müdafiə Nazirliyinin rəsmi saytında məlumat verilib. Day.Az-ın Gazeta.ru-ya istinadən verdiyi xəbərə görə, bu aerostatlar kəşfiyyat, müşahidə və rekonesans tapşırıqlarının yerinə yetirilməsi üçün istifadə ediləcək.

Bu il həmin aerostatlar ABŞ-ın Cənubi Dakota ştatında sınaqdan keçirilib. Onlar 18-24 kilometr hündürlükdə, 3700 kilometrdən çox məsafəni qət edə bilir. Aerostatlar 3 kiloqrama qədər yük daşımaq və fasiləsiz olaraq 5 gündən artıq fəaliyyət göstərmək qabiliyyətinə malikdir.

Aerostatların hazırlanması üzrə işlər Voltitude şirkəti tərəfindən, ABŞ-ın Aerostar şirkəti və Landguard Systems elektronika istehsalçısı ilə birgə həyata keçirilir.