BYD şirkəti L4 səviyyəli ağıllı parklanma sistemini təqdim etdi

Çinin avtomobil istehsalçısı BYD L4 səviyyəli avtonom idarəetmə texnologiyasına uyğun ağıllı parklanma sistemini təqdim edib. Şirkətin verdiyi məlumata görə, bu sistem tam təhlükəsizlik təminatı verir və parklanma zamanı yarana biləcək potensial zərərləri kompensasiya etməyi öhdəsinə götürür.

BYD-nin açıqlamasında qeyd olunur ki, avtomobil avtomatik parklanma zamanı zədələnərsə, sürücü şirkətin xidmət mərkəzi ilə əlaqə saxlamalıdır. Bu halda BYD bütün məsuliyyəti öz üzərinə götürür və belə hadisələr sürücünün növbəti il üçün sığorta haqqına təsir göstərmir. Şirkət bu addımın, "Allahın gözü" adlandırılan ağıllı idarəetmə sisteminin texniki etibarlılığına olan tam inamını əks etdirdiyini vurğulayıb.

Avtonom idarəetmənin L4 səviyyəsi müəyyən şəraitlərdə yüksək dərəcədə müstəqil idarəetməni nəzərdə tutur. Parklanma ilə bağlı olaraq, bu sistem xüsusi olaraq işarələnmiş park yerlərində istifadə üçün nəzərdə tutulub.

BYD şirkəti 1995-ci ildə yaradılıb və baş ofisi Çinin cənubundakı Quandun vilayətinin Şençjen şəhərində yerləşir. Şirkətin səhmləri Honkonq və Şençjen birjalarında ticarət edilir. BYD dünya üzrə 30-dan artıq sənaye parkı qurub. Avtomobillərlə yanaşı, şirkət akkumulyatorlar, günəş panelləri, smartfon komponentləri və yarımkeçiricilər istehsal edir.