Cənubi Koreya dünya səviyyəsində humanoid robotlar sahəsində irəliləyiş əldə etməyi hədəfləyir. Bu məqsədlə, WIRobotics adlı Cənubi Koreya şirkəti ALLEX adlı ümumi təyinatlı humanoid robotunu ictimaiyyətə təqdim edib. ALLEX-in adı "ALL EXperience" ifadəsinin qısaldılmış formasıdır və robot ətraf mühitlə sıx qarşılıqlı əlaqə qurmaq üçün xüsusi olaraq dizayn edilib.

Hazırda robotun yalnız yuxarı bədən hissəsi təqdim olunub. ALLEX-in texniki göstəriciləri arasında 48 sərbəstlik dərəcəsi xüsusi diqqət çəkir. Bu göstəricilər barmaq hissəsində 15, hər qolda 7, boyunda 2 və bud nahiyəsində 2 sərbəstlik dərəcəsi kimi paylanır. Robotun əl hissəsinin çəkisi 0,7 kiloqram, qollarının çəkisi isə 5 kiloqramdır. ALLEX bir qolla 3 kiloqramdan artıq yük qaldırmağı bacarır və barmaq ucunda 40 N güc tətbiq edə bilir. Robot manipulyasiya dəqiqliyi ±0,3 millimetr səviyyəsindədir. Tutma gücü isə 30 kiloqram və ya 294 N-dir.

Robotun diqqətəlayiq xüsusiyyətlərindən biri də xüsusi toxunma sensorları olmadan 100 qram (0,98 N) qüvvəni hiss edə bilməsidir. ALLEX-in əl sistemində sürtünmə və rotasiya inersiyası adi kollaborativ robotlarla müqayisədə 10 dəfə azdır. Şirkət bildirib ki, ALLEX yaxın gələcəkdə modulyar platformaya çevriləcək. Bu, istifadəçilərə öz ehtiyaclarına uyğun komponentlər quraşdırmağa imkan yaradacaq. Bundan əlavə, RLWRLD adlı startap ilə əməkdaşlıq çərçivəsində fiziki süni intellektin ALLEX-ə inteqrasiyası planlaşdırılır.

ALLEX-in genişmiqyaslı seriya istehsalına bu ilin dördüncü rübündə başlanacağı gözlənilir. Bu layihə, humanoid robot texnologiyasında yeni imkanlar yaradacağına dair ümidləri artırır.