Çində iki dövlət gəmiqayırma şirkətinin birləşdirilməsi prosesi bu həftə tamamlanır. Bu barədə The Wall Street Journal (WSJ) məlumat yayıb. İki şirkətin – China State Shipbuilding (CSSC) və China Shipbuilding Industry – birləşməsi nəticəsində dünyanın ən böyük gəmiqayırma holdinqi yaradılacaq. Yeni qurum dünya bazarının 17%-ni əhatə edəcək və təxminən 18 milyard dollar gəlir əldə edəcək.

Birgə şirkətin sifariş portfelinə 54 milyon ton yükgötürmə qabiliyyətinə malik 530-dan çox gəmi daxildir ki, bu da dünyada ən yüksək göstəricidir. WSJ qeyd edir ki, CSSC və China Shipbuilding Industry əvvəllər bir şirkət olub, lakin 1999-cu ildə Çin hökuməti rəqabəti gücləndirmək məqsədilə onu bölmək qərarı alıb. Hazırda isə Pekin dövlət müəssisələrinin, xüsusilə müdafiə sənayesi ilə bağlı sektorların birləşdirilməsini prioritet hesab edir.

Hər iki şirkət əsasən kommersiya layihələrinə yönəlib, lakin CSSC Çin Hərbi Dəniz Qüvvələri üçün iri sifarişlər də yerinə yetirir. China Shipbuilding Industry isə Çinin ilk təyyarədaşıyan gəmisini – "Şanxay" adlı gəmini layihələndirib və inşa edib.

Ekspertlər hesab edir ki, bu birləşmə Çinin dünya gəmiqayırma sahəsində liderliyini daha da möhkəmləndirəcək. Ötən il dünya üzrə tikilən gəmilərin 55%-i Çində inşa edilib, ABŞ-ın payı isə cəmi 0,05% təşkil edib. Beləliklə, Çinin gəmiqayırma gücü ABŞ-ınkından 232 dəfə çoxdur. Analitiklər hesab edir ki, bu birləşmə Çin şirkətlərinə ABŞ prezidenti Donald Tramp administrasiyası tərəfindən tətbiq edilən tariflərə daha effektiv şəkildə qarşı çıxmağa imkan verəcək.