TRAPPIST-1-də Yadplanetli Siqnallarının Axtarışı

Çinli alimlər TRAPPIST-1 planet sistemində yadplanetli sivilizasiyaların siqnallarını araşdırıblar. Bu sistem Yer planetindən cəmi 40 işıq ili uzaqlıqda yerləşir və yeddi qayalı planetdən ibarətdir. Bu planetlərdən üçü yaşayış üçün əlverişli zona daxilindədir. Xüsusilə TRAPPIST-1e planeti "ikinci Yer" olmaq üçün ən yaxşı namizədlərdən biri hesab olunur.

Araşdırma Deçjou Universitetindən Guan-Yuan Sunun rəhbərlik etdiyi bir qrup tərəfindən həyata keçirilib. Onlar dünyanın ən həssas radioteleskopu olan, 500 metrlik FAST vasitəsilə müşahidələr aparıblar. Cəmi 1,67 saatlıq müşahidələr zamanı alimlər 1,05–1,45 GHz tezlik aralığını rekord səviyyədə spektral dəqiqliklə skan ediblər. Bu, hətta çox zəif süni mənşəli siqnalları da aşkar etməyə imkan verə bilərdi.

Nəticələr və Gələcək Planlar

"Biz çox dar radiotezliklər axtarırdıq, hansılar ki, planetlərin hərəkəti səbəbilə zamanla dəyişə bilərdi. Bu cür siqnallar təbii proseslərlə izah edilə bilməz," - deyə tədqiqatçılar qeyd ediblər. Lakin məlumatların analizi yadplanetli siqnalları aşkar edə bilməyib.

Buna baxmayaraq, tədqiqat mühüm əhəmiyyət daşıyır. O, TRAPPIST-1 sistemində radioyayım edən sivilizasiyaların mövcudluğu ilə bağlı yeni məhdudiyyətlər qoyur və müasir SETI (Yadplanetli Ağıllı Həyatın Axtarışı) proqramının imkanlarını nümayiş etdirir. Alimlər vurğulayırlar ki, siqnalın olmaması həyatın mövcud olmaması anlamına gəlmir. Ola bilsin ki, potensial sivilizasiyalar fərqli rabitə üsulları istifadə edir və ya siqnalları qeyri-müntəzəm şəkildə göndərirlər.

Gələcəkdə araşdırma qrupu dövri və qısa müddətli siqnalları da əhatə edən daha geniş axtarışlar planlaşdırır. TRAPPIST-1 sistemi hələ də SETI üçün ən cəlbedici obyektlərdən biri olaraq qalır və hər yeni araşdırma bizi "Kainatda təkikmi?" sualına cavab tapmağa daha da yaxınlaşdırır.