İtalyan mexanik və "YouTuber" Andrea Maratsi, 1993-cü il istehsalı "Fiat Panda" avtomobilini dünyanın ən dar avtomobilinə çevirərək maraqlı bir layihəyə imza atıb. Bu qeyri-adi avtomobilin eni cəmi 50 santimetrdir və yalnız sürücü ilə bir fara üçün nəzərdə tutulub. Maratsi bu layihəyə 12 ayını sərf edib və avtomobilin 99%-i orijinal hissələrdən ibarətdir. Lakin mühərrik yerinə elektrik enerjisi istifadə olunur.

Avtomobilin ölçüləri də olduqca diqqətçəkəndir: hündürlüyü 145 sm, uzunluğu 340 sm və çəkisi 264 kq-dır. Bu mini avtomobilin maksimal sürəti isə 15-25 km/saat arasında dəyişir. Lakin bu avtomobil yol hərəkəti üçün nəzərdə tutulmayıb, daha çox maraqlı və yaradıcı bir layihə kimi hazırlanıb.

Maratsi hazırda bu unikal avtomobili Ginnesin Rekordlar Kitabına daxil etdirmək üçün müraciət edib. Bu layihə həm avtomobil həvəskarları, həm də texniki yaradıcılığı sevənlər arasında böyük maraq doğurur.