YouTube platformasında Nittrx adlı məşhur bloger, Nvidia-nın flaqman videokartı ilə təchiz edilmiş ən güclü portativ oyun konsolunu təqdim edib. Day.Az-ın Gazeta.ru-ya istinadən verdiyi xəbərə görə, bu cihazın performansı ən güclü oyun noutbukları ilə müqayisə edilə bilər.

Yeni cihaz Nvidia GeForce RTX 4090 Laptop videokartı ilə təchiz olunub. Videokart 16 GB GDDR6 yaddaşa və 174 Vt enerji sərfiyyatına malikdir. Konsolun yüksək performansını təmin edən digər komponentlər arasında Intel Core i9-14900HX prosessoru, 64 GB RAM və 2 TB SSD yaddaş yer alır.

Ekran olaraq Dell Latitude 12 E7275 noutbukundan götürülmüş 12,5 düymlük 4K çözünürlüklü sensorlu IPS displey istifadə edilib. Lakin bu portativ konsolun batareyası yoxdur və enerji təminatı üçün standart noutbuk adapterindən istifadə olunur.

Nittrx tərəfindən keçirilən testlərə əsasən, cihaz Cyberpunk 2077 oyununu 4K çözünürlükdə, maksimum qrafik parametrlərlə 60-70 FPS sürətlə işə sala bilir. God of War isə 110-120 FPS sürətlə çalışır. Bu zaman prosessorun temperaturu 67°C, videokartın isə 72°C-ə çatır. Konsol Windows əməliyyat sistemi ilə idarə olunur.

Hal-hazırda bazarda təqdim edilən portativ konsolların əksəriyyəti inteqrasiya olunmuş qrafik sürətləndiricilərdən istifadə edir ki, bunlar performans baxımından ayrı-ayrı qrafik kartlardan geri qalır. Bununla belə, tam ölçülü qrafik sürətləndiricilər yüksək enerji sərfiyyatı ilə seçilir ki, bu da belə həllərin istifadəsini çətinləşdirir.