Dünyanın müxtəlif yerlərində genetik mənşəli eşitmə itkiləri geniş yayılıb. Lakin tibb sahəsində əldə edilən yeni nailiyyətlər nəticəsində bu problemin aradan qaldırılması istiqamətində böyük addımlar atılır. Çində aparılan bir araşdırma nəticəsində 10 nəfərin eşitmə qabiliyyətini bərpa etməsi mümkün olub.

Araşdırma çərçivəsində OTOF geninin funksional versiyası xüsusi bir metodla xəstələrə tətbiq edilib. Bu gen, eşitmə siqnallarının qulaqdan beyinə ötürülməsində mühüm rol oynayır. Müalicə zamanı genetik material "adeno-assosiasiyalı virus" (AAV) vasitəsilə daxili qulağın bazasında yerləşən membrana yeridilib. Bu metod əvvəllər də genetik müalicələr üçün təhlükəsiz və effektiv üsul kimi tanınıb.

Araşdırma "Nature Medicine" jurnalında yayımlanıb və 1-24 yaş arası 10 pasiyent üzərində həyata keçirilib. Xəstələrdə eşitmə qabiliyyətində əhəmiyyətli irəliləyişlər qeydə alınıb. Məsələn, əvvəllər 106 desibel səviyyəsində (yaxın məsafədən avtomobil siqnalı səsi ilə müqayisə edilə bilər) səs qəbul edən xəstələr, müalicədən sonra bu göstəricini 52 desibelə qədər azaldıblar. Bu, adi bir söhbət səviyyəsinə uyğundur.

Aparılan müalicə nəticəsində ən böyük irəliləyiş 5-8 yaş arası uşaqlarda müşahidə edilib. Xüsusilə 7 yaşlı bir qızcığazın dörd ay ərzində demək olar ki, tam eşitmə qabiliyyətini bərpa etdiyi və anası ilə gündəlik söhbətlər edə bildiyi bildirilib.

Karolinska İnstitutundan (İsveç) Maoli Duan bu araşdırmanın əhəmiyyətini vurğulayıb: “Bu, genetik mənşəli eşitmə itkilərinin müalicəsində böyük bir addımdır. Bu metodun həm uşaqlarda, həm də böyüklərdə tətbiq edilə biləcəyini görmək ümidvericidir.”

Alimlər, bu uğurun yalnız başlanğıc olduğunu və GJB2, TMC1 kimi daha mürəkkəb genetik mutasiyalar üzərində də araşdırmaların davam etdiyini bildiriblər. Heyvan modellərində əldə edilən nəticələr ümidverici olsa da, genetik eşitmə itkilərinin tam müalicəsi üçün hələ çox iş görülməlidir.

Bu kimi tədqiqatlar gələcəkdə genetik mənşəli eşitmə problemlərinin aradan qaldırılmasına və bir çox insanın həyat keyfiyyətinin yaxşılaşdırılmasına böyük töhfə verə bilər.