Google, Pixel 10 seriyasını rəsmi təqdimatından təxminən bir ay əvvəl təsadüfən üzə çıxarıb. Çərşənbə günü Android Authority, Google Play Store-da gizli bir banner taparaq Pixel 10, Pixel 10 Pro, Pixel 10 Pro XL və Pixel 10 Pro Fold modellərini aşkar edib. Bannerin hazırda Play Store-da birbaşa görünmədiyi, lakin Android Authority-nin müəyyən üsullarla onu aktivləşdirdiyi qeyd edilir.

Bannerdə "Yeni Pixel 10 seriyası ilə tanış olun" ifadəsi və dörd cihaz təsvir olunub. Pixel 10 Pro XL, Pixel 10 Pro Fold və Pixel 10 Pro modelləri "Moonstone" adlı gümüş-mavi rəngdə, əsas Pixel 10 isə parlaq mavi rəngdə göstərilib. Bu dizayn və rənglər son həftələrdə yayılan sızıntılarla, eləcə də Google-un özünün paylaşdığı tizerlərlə üst-üstə düşür.

Bannerdə həmçinin cihazlar üçün 50 dollarlıq endirim təklifi də yer alır. Bu təklifin 13 oktyabr tarixinə qədər qüvvədə olduğu bildirilir.

Şayiələrə görə, Pixel 10 seriyasında ciddi yeniliklər gözlənilir. Əsas Pixel 10 modelinə üçüncü kamera əlavə edilməsi, Pixel 10 Pro modelinin texniki göstəricilərinin artırılması və Pixel 10 Pro Fold modelinin toz keçirməyən xüsusiyyətə malik olması planlaşdırılır.

Google-un Pixel 10 seriyasını 20 avqust tarixində keçiriləcək "Made by Google" tədbirində rəsmi olaraq təqdim edəcəyi gözlənilir.