GPD şirkəti yeni nəsil güclü portativ oyun konsolu olan Win 5-i rəsmi olaraq təqdim edib. Bu barədə məlumatı Videocardz portalı yayıb, Day.Az isə Gazeta.ru-ya istinadən xəbər verir. Yeni cihaz yüksək məhsuldarlığı kompakt ölçülər və cəmi 565 qramlıq çəkisi ilə birləşdirir.

Win 5 konsolu, xüsusilə, rəqibləri ilə müqayisə edildikdə diqqət çəkir. Məsələn, o, ölçü baxımından Steam Deck-dən daha kiçikdir. Xarici batareya ilə təchiz olunanda isə cihazın çəkisi 915 qram olur. Konsolun konstruktor xüsusiyyətlərindən biri daxili batareyanın olmamasıdır; enerji təminatı üçün batareya xaricdən qoşulur.

Cihazın əsas gücü AMD Ryzen AI MAX+ 395 prosessorudur. Bu prosessor 16 Zen 5 nüvəsi və Radeon 8060S inteqrasiya olunmuş qrafikası ilə təchiz olunub. Radeon 8060S-in performansı RTX 4060 və ya RTX 5050 qrafik kartları ilə müqayisə edilə bilər.

GPD Win 5 7 düymlük LTPS ekrana, 32 GB operativ yaddaşa və minimum 1 TB SSD yaddaşına malikdir. Digər texniki xüsusiyyətlər arasında USB4 (40 Gbit/s), iki USB-C 3.2, dörd USB 3.2, HDMI, RJ45 portları, həmçinin microSD və yeni formatlı Mini SSD slotları yer alır.

Cihazın rəsmi satış qiyməti hələ açıqlanmayıb. Lakin gözlənilir ki, Win 5 bazarda ən bahalı portativ oyun konsollarından biri olacaq.