Yer Kürəsində yaxın bir həftə ərzində geomaqnit şəraitinin pisləşməsi gözlənilir. Bu vəziyyət Günəşdə yaranmış böyük tac dəliyi ilə əlaqədardır və son iki ayın ən güclü maqnit qasırğası cümə günü başlayacaq. Bu barədə Rusiya Elmlər Akademiyasının Kosmik Tədqiqatlar İnstitutu və Günəş-Yer Fizikası İnstitutunun Günəş Astronomiyası Laboratoriyası məlumat verib.

Laboratoriyanın verdiyi məlumata görə, geomaqnit şəraitinin pisləşməsi artıq bu gün, cümə axşamından cümə gecəsinə keçən gecə başlayacaq. Çünki plazma buludunun Yerə çatmasından bir neçə saat əvvəl planetimiz böyük bir tac dəliyinin təsir zonasına daxil olacaq. Bu isə geomaqnit şəraitinin kəskin pisləşməsinə səbəb olacaq və bu vəziyyət təxminən bir həftə davam edəcək.

Son hesablamalara əsasən, 5 avqust tarixində baş vermiş M4.4 səviyyəli böyük Günəş partlayışından sonra yaranan kütlə atılmasının Yerə çatması əvvəlki proqnozlardan daha ciddi geomaqnit təsirlər yaradacaq. Əvvəlcə plazma buludunun birbaşa Yerə yönəlmədiyi, təxminən 45 dərəcəlik bucaqla kənara atıldığı güman edilirdi. Buna görə də, ya planetimizə heç təsir etməyəcəyi, ya da atılan Günəş maddəsinin seyrək bölgələrinin Yerə çatacağı düşünülürdü. Lakin son hesablamalar göstərdi ki, yüksək sürətli plazma buludunun nüvəsi Yerə çatacaq və planetin maqnit sahəsinə təsiri gözləniləndən daha güclü olacaq.

Məlumata görə, plazma buludunun Yerə çatması sabah, 8 avqust tarixində, Moskva vaxtı ilə səhər saat 7-də baş verəcək. Bu zaman geomaqnit indeksinin Kp 6 səviyyəsinə çatacağı proqnozlaşdırılır. Bu isə 13 iyundan bəri qeydə alınmış ən yüksək göstəricidir. Həmin tarixdə də bu səviyyədə bir maqnit qasırğası baş vermişdi.

Kosmik hava şkalasına əsasən, bu ölçüdə hadisələr orta səviyyəli sayılır. Lakin belə qasırğalar yüksək en dairələrində yerləşən enerji sistemlərinə təsir edə, kosmik aparatların orbital hərəkətlərində fərqlər yarada və radio dalğalarının yayılmasına təsir göstərə bilər. Mütəxəssislərin fikrincə, bu səviyyəli qasırğalar zamanı yaranan qütb parıltıları adətən 60 dərəcəlik en dairələrində görünür, lakin bəzən 50 dərəcəyə qədər enə bilər.