Moskva, 9 iyul. Günəşdə yeni bir güclü partlayış baş verib. Bu barədə TASS agentliyinə Rusiya Tətbiqi Geofizika İnstitutundan məlumat verilib. Partlayışın gücü M sinifinə aid olub və onun müddəti 28 dəqiqə təşkil edib.

Tətbiqi Geofizika İnstitutunun məlumatına görə, partlayış 9 iyul tarixində Moskva vaxtı ilə saat 07:25-də rentgen diapazonunda M1.3 (N20E78) gücündə qeydə alınıb. Əvvəlki gün, 8 iyulda da bu sinfə aid başqa bir partlayışın baş verdiyi bildirilmişdi.

Rusiya Elmlər Akademiyasının Kosmik Tədqiqatlar İnstitutu (IKİ RAN) və Sibir Bölməsi Günəş Astronomiyası Laboratoriyasının məlumatına əsasən, hər iki partlayış Yerə heç bir təsir göstərməyəcək.

Günəş partlayışları gücünə görə beş sinfə bölünür: A, B, C, M və X. Ən zəif sinif olan A0.0, Yer orbitində kvadrat metrə 10 nanovatt radiasiya gücünə bərabərdir. Hər növbəti sinifdə radiasiya gücü 10 dəfə artır. Bəzi partlayışlar Günəş plazmasının atılması ilə müşayiət olunur. Bu plazma buludları Yerə çatdıqda maqnit fırtınalarına səbəb ola bilər.