Hindistanın ilk astronavtı Şubhanşu Şukla Beynəlxalq Kosmik Stansiyaya (ISS) səfəri başa vuraraq uğurla Yerə qayıdıb. SpaceX şirkətinin verdiyi məlumata görə, Şukla və Axiom Mission 4 (Ax-4) missiyasının dörd nəfərlik heyəti çərşənbə axşamı Yer atmosferinə daxil olub və Sakit Okeanda, Kaliforniyanın San-Dieqo şəhəri yaxınlığında suya eniş edib.

Crew Dragon "Grace" kosmik gəmisinin suya enişindən dərhal sonra xilasetmə qayıqları astronavtları götürmək üçün bölgəyə göndərilib. Yerə qayıdan heyət üzvlərinin sağlamlıq vəziyyətini qiymətləndirmək üçün tibbi müayinələr aparılıb. Hindistan Hərbi Hava Qüvvələrinin qrup kapitanı olan Şukla, missiyanın pilotu kimi xidmət edirdi. Hazırda o və heyət üzvləri Yer mühitinə yenidən uyğunlaşma prosesinə başlayıblar.

Bu səfər 18 günlük tədqiqat missiyasının uğurla başa çatması ilə yadda qalıb. Heyət ISS-də iki həftədən çox müddət ərzində kənd təsərrüfatı, tibb, su sistemləri və mikroqravitasiya şəraitində insan fiziologiyası kimi sahələrdə 60-dan çox elmi təcrübə aparıb. ISS-dən bazar ertəsi ayrılan kosmik gəmi Yerə qayıtmaq üçün təxminən 22,5 saatlıq səyahət edib.

Hindistanın Baş Naziri Narendra Modi bu hadisə ilə bağlı "X" platformasında paylaşım edərək, "Şubhanşu Şukla Beynəlxalq Kosmik Stansiyaya səfər edən ilk Hindistan astronavtı olaraq milyardlarla insanın xəyalını gerçəkləşdirdi. Bu nailiyyət, Hindistanın öz insanlı kosmik uçuş proqramı olan 'Gaganyaan' layihəsinə doğru daha bir addımdır," deyə qeyd edib. Hindistanın bu insanlı kosmik uçuş missiyasının 2027-ci ildə həyata keçirilməsi planlaşdırılır.

Şukla, Hindistan adına kosmosa gedən ikinci şəxsdir. İlk dəfə 1984-cü ildə Hindistan Hərbi Hava Qüvvələrinin qanad komandiri Rakeş Şarma Sovet İttifaqına məxsus Soyuz kosmik gəmisində uçuş etmişdi. Şukla 2020-ci ildə Hindistanın Kosmos Departamenti tərəfindən Ax-4 missiyası üçün əsas astronavt seçildikdən sonra Moskvadakı Yuri Qaqarin Kosmonavt Təlim Mərkəzində genişmiqyaslı təlim keçib.

Ax-4 missiyasının yenidən giriş prosesi, mart ayında SpaceX-in "Freedom" kapsulu ilə Atlantik Okeanında eniş edən astronavtlar Sunita Vilyams və Butç Uilmore-un prosesinə bənzəyirdi.