Huawei şirkəti yeni orta büdcəli MatePad 11.5 S 2025 planşetini təqdim edib. Bu cihaz 144 Hz-lik təsvir yenilənməsinə malik, 2800x1840 piksel keyfiyyətli 11.5 düymlük LCD ekranla təchiz olunub. Şirkət planşetin hansı prosessor vasitəsilə çalışdığını açıqlamasa da, cihazın Huawei-nin özünün istehsal etdiyi Kirin prosessoru ilə işlədiyi ehtimal olunur. Bununla belə, Kirin prosessorunun konkret modeli hələ ki, məlum deyil.

Planşet 8 və ya 12 GB RAM ilə yanaşı, 256 və ya 512 GB daxili yaddaş həcmi təqdim edir. Kamera xüsusiyyətlərinə gəldikdə, MatePad 11.5 S 2025 13 MP-lik arxa kamera və 8 MP-lik ön kamera ilə təchiz olunub. Batareya texnologiyası baxımından isə cihaz 40 vatt gücündə sürətli şarj dəstəyi ilə 8800 mAh enerji tutumlu batareyaya malikdir.

Huawei MatePad 11.5 S 2025 planşeti ilk olaraq 21 avqust tarixində Çində satışa çıxarılacaq. Onun qiyməti 306 ABŞ dollarından başlayır. Planşetin digər ölkələrdə satışa çıxarılıb-çıxarılmayacağı hələ ki, bilinmir.