Apple şirkətinin bu payızda təqdim edəcəyi gözlənilən iPhone 17 modelinə dair yeni texniki xüsusiyyətlər barədə məlumatlar yayılıb. GF Securities analitiki Jeff Pu-nun verdiyi proqnozlara əsasən, iPhone 17 modelində A18 prosessoru əvəzinə daha müasir Apple A19 prosessoru istifadə ediləcək. Bu prosessor həmçinin iPhone 17 Air modelində də quraşdırılacaq. Əvvəlki məlumatlarda iPhone 16-da istifadə olunan A18 prosessorunun yeni modeldə saxlanılacağı ehtimal edilirdi. Lakin A19 prosessoru daha yüksək məhsuldarlıq və enerji səmərəliliyi ilə seçilir ki, bu da mürəkkəb tətbiqlər, oyunlar və süni zəka ilə işləmə zamanı böyük üstünlük təmin edir.

iPhone 17-nin baza modeli və iPhone 17 Air standart olaraq LPDDR5 texnologiyalı 8 GB RAM-lə təchiz olunacaq. Daha güclü iPhone 17 Pro və Pro Max modellərində isə LPDDR5X texnologiyalı 12 GB RAM olacaq. Bundan əlavə, Apple bu modellərdə öz istehsalı olan Wi-Fi 7 çipindən istifadə edəcək. Bu texnologiya daha sürətli və stabil naqilsiz bağlantı təmin edəcək ki, xüsusilə streaming, oyunlar və bulud servisləri üçün böyük üstünlük hesab olunur.

iPhone 17-nin baza modeli 120 Hz təsvir yenilənməsinə malik 6.3 düymlük OLED ekranla təchiz ediləcək. Lakin Pro modellərdən fərqli olaraq, bu ekran LTPO (ProMotion) texnologiyasını dəstəkləməyəcək. LTPO texnologiyası ekranın yenilənmə tezliyini dinamik şəkildə dəyişərək batareya enerjisinə qənaət etməyə imkan verir.