Apple-ın gələcək flaqmanı olan iPhone 17 Pro modeli kamera sahəsində bir sıra əhəmiyyətli yeniliklərlə təqdim edilə bilər. Bu barədə MacRumors portalı Apple üçün reklam materiallarının hazırlanması ilə tanış olan anonim mənbəyə istinadən məlumat yayıb. Xəbəri Gazeta.ru portalına əsaslanaraq Day.Az təqdim edib.

Məlumata görə, əsas yeniliklərdən biri 8x optik zoom xüsusiyyətinə malik təkmilləşdirilmiş teleobyektiv olacaq. Bu, iPhone 16 Pro modelindəki 5x zoom ilə müqayisədə əhəmiyyətli bir irəliləyişdir. Yeni obyektivdə linzaların hərəkətli sistemi tətbiq ediləcək ki, bu da müxtəlif fokus məsafələrində fasiləsiz və hamar optik zoom imkanını təmin edəcək.

Bundan əlavə, məlumatda Apple tərəfindən peşəkar foto və video çəkiliş üçün yeni bir tətbiqin təqdim edilə biləcəyi qeyd olunur. Bu tətbiq Halide və Filmic Pro kimi populyar proqramlarla rəqabət aparmaq məqsədi daşıyır. Həmçinin cihazın üst hissəsində kamera idarəetməsi üçün əlavə bir düymənin əlavə ediləcəyi bildirilib. Bu düymə cihazın yan tərəfindəki mövcud düyməni tamamlayacaq.

Mənbə həmçinin, cihazın korpusunda mis rənginə oxşayan yeni bir rəng seçiminin əlavə ediləcəyini və Apple loqotipinin arxa panelin ortasında yerləşdiriləcəyini təsdiqləyib. Bu məlumat daha əvvəl Bloomberg jurnalisti Mark Qurman tərəfindən səsləndirilən proqnozlarla üst-üstə düşür. Qurman, iPhone 17 seriyasının xüsusilə video çəkiliş imkanlarının inkişafına diqqət yetirəcəyini və bununla da vloggerlər və məzmun yaradıcılarını cəlb etməyi hədəfləyəcəyini bildirmişdi.