Azərbaycanın İnnovasiya və Rəqəmsal İnkişaf Agentliyi (İRİA), kibertəhlükəsizlik və informasiya təhlükəsizliyi sahəsində əməkdaşlığı genişləndirmək və kibertəhlükəsizlik klublarının fəaliyyətini dəstəkləmək niyyətindədir. Bu barədə İRİA-nın İdarə Heyətinin sədri Fərid Osmanov, Azərbaycanın Kibertəhlükəsizlik Mərkəzinin növbəti məzun buraxılışı zamanı açıqlama verib.

Fərid Osmanov qeyd edib ki, rəqəmsal texnologiyaların gündəlik həyata inteqrasiyası, mobil telefonlardan ödəniş sistemlərinə qədər bir çox sahədə asanlıq və effektivlik yaradır. Lakin bu texnologiyaların geniş tətbiqi ilə yanaşı, müəyyən risklər və təhdidlər də ortaya çıxır. Buna görə də dövlət qurumları, özəl sektor və fərdi istifadəçilər kibertəhlükəsizlik məsələlərinə xüsusi diqqət yetirməlidir.

O, həmçinin bildirib ki, Azərbaycanda kibertəhlükəsizlik sahəsində genişmiqyaslı tədbirlər həyata keçirilir. Prezident İlham Əliyevin 28 avqust 2023-cü ildə təsdiqlədiyi "Azərbaycan Respublikasının İnformasiya Təhlükəsizliyi və Kibertəhlükəsizlik Strategiyası (2023-2027)" çərçivəsində risklərin reyestrinin yaradılması, insidentlərin monitorinqi, süni intellektin tətbiq sahələrinin genişləndirilməsi və şəxsi məlumatların qorunması kimi mühüm istiqamətlər müəyyən edilib.

Strategiyanın əsas prioritetlərindən biri ixtisaslı kadr potensialının inkişafıdır. Eyni zamanda, cari ilin yanvar ayında təsdiqlənmiş Rəqəmsal İnkişaf Konsepsiyası çərçivəsində rəqəmsal cəmiyyətə keçid və rəqəmsal inkişafı təmin etmək məqsədilə kadr potensialının gücləndirilməsi üçün müxtəlif tədbirlərin həyata keçirilməsi nəzərdə tutulur. Bu tədbirlər arasında əhalinin rəqəmsal savadlılığının artırılması, müasir İKT sahəsində peşəkar mütəxəssislərin hazırlanması və müxtəlif təlim proqramlarının təşkili yer alır.

Fərid Osmanov əlavə edib ki, 2023-cü ildə Azərbaycan Kibertəhlükəsizlik Mərkəzi, Rəqəmsal İnkişaf və Nəqliyyat Nazirliyi, İRİA, İsrailin Technion Texnoloji İnstitutu və PASHA Holding-in dəstəyilə təsis edilib. Mərkəz, dövlət qurumları və özəl sektorun İKT rəhbərləri üçün süni intellekt və kibertəhlükəsizlik mövzularında təlimlər keçirir. Bu təlimlərin əhəmiyyəti böyükdür, çünki beynəlxalq tədqiqatlara görə, artan kibertəhdidlərin bir çoxu məhz süni intellekt vasitəsilə həyata keçirilir.

Bu gün Mərkəzin 5-ci məzun buraxılışı çərçivəsində 100 tələbə, o cümlədən 20 Red Team, 40 Blue Team və 40 Purple Team məzunu olub. Qeyd edək ki, Purple Team təlimləri ölkədə ilk dəfə olaraq bu mərkəzdə keçirilib. Oktyabr ayında əlavə 40 mütəxəssisin təlimi planlaşdırılır.

Mərkəz, həmçinin tələbələrin əmək bazarına inteqrasiya olunmasına kömək etmək məqsədilə karyera inkişafı üzrə təlimlər təşkil edir. İlk dörd proqram üzrə məzunların 74 faizi öz ixtisaslarına uyğun iş tapıb. Beşinci proqram çərçivəsində isə tələbələrin 30 faizi təhsillərini başa vurmadan iş təklifləri alıb.

İRİA, kibertəhlükəsizlik sahəsində insan kapitalını gücləndirmək və gənclərin bilik və bacarıqlarını artırmaq məqsədilə ali və peşə təhsil müəssisələri ilə əməkdaşlıq edir. Bu çərçivədə Azərbaycan Texniki Universitetinin SABAH magistr qruplarında "Rəqəmsal ekspertiza" fənni tədris olunur, Bakı Peşə Təhsil Mərkəzində "Kibertəhlükəsizlik" fənninin əsasları öyrədilir. Azərbaycan Dövlət Neft və Sənaye Universitetində 2025-2026-cı tədris ilindən "İnformasiya təhlükəsizliyi" fənni tədris olunacaq.

Gələcəkdə Bakı Ali Neft Məktəbi, ADA Universiteti və digər təhsil müəssisələri ilə əməkdaşlığın genişləndirilməsi planlaşdırılır. Bu əməkdaşlıq çərçivəsində kibertəhlükəsizlik klublarının dəstəklənməsi də nəzərdə tutulur.