Artıq iş yerinə dair arayış almaq daha sürətli və rahat oldu. “mygov” rəqəmsal hökumət platforması üzərindən təqdim edilən yeni xidmət sayəsində vətəndaşlar iş yerinə dair arayışı elektron şəkildə əldə edə bilirlər. Bu yenilik İnnovasiya və Rəqəmsal İnkişaf Agentliyi ilə Əmək və Əhalinin Sosial Müdafiəsi Nazirliyinin birgə əməkdaşlığı nəticəsində reallaşdırılıb.

“mygov”da iş yerinə dair arayış necə alınır?

Yeni xidmət vətəndaşlara iş yerinə dair arayışı birbaşa “mygov” platformasından almağa imkan yaradır. Sənəd elektron formatda (PDF) hazırlanır və təqdimata tam hazır vəziyyətdə olur. Arayış viza, kredit, ipoteka və ya digər rəsmi məqsədlər üçün istifadə edilə bilər.

Xidmətdən istifadə qaydaları isə çox sadədir:

• Vətəndaş “mygov” platformasında “Xidmətlər” bölməsinə daxil olur və “Məşğulluq” kateqoriyasından “İş yerinə dair arayışın alınması” xidmətini seçir.
• Sistem avtomatik olaraq istifadəçinin aktiv əmək müqaviləsini yoxlayır və mövcud müqavilələrdən birini seçir.
• İstifadəçi arayışda görünəcək məlumatları özü müəyyən edir: əməkhaqqının göstərilib-göstərilməməsi, arayışın məqsədi (viza, kredit, ipoteka və s.) və əlaqə nömrəsi.
• Əgər arayış müəyyən bir quruma təqdim ediləcəksə, istifadəçi həmin qurumun VÖEN-i və ya adını daxil edir.
• Təsdiqdən sonra sistem avtomatik olaraq arayışı yaradır, ona unikal sənəd nömrəsi və QR kod əlavə edir.

Şəffaflıq və sürət

Hazırlanmış sənədi vətəndaşlar elektron formatda yükləyərək istənilən quruma təqdim edə bilərlər. Bundan əlavə, kənar qurumlar və ya şəxslər arayışın doğruluğunu QR kod vasitəsilə, sənəd nömrəsini daxil etməklə, həmçinin “my.gov.az” portalında “Sənəd axtarışı” bölməsi vasitəsilə onlayn şəkildə yoxlaya bilirlər.

Bu xidmət dövlət xidmətlərinin rəqəmsallaşdırılması istiqamətində atılan mühüm addımlardan biridir. Yenilik sayəsində vətəndaşlar gündəlik əməliyyatlarını daha sürətli, şəffaf və rahat şəkildə həyata keçirə biləcəklər. Rəqəmsal hökumət platformasının bu növbəti addımı insanların vaxtını və enerjisini qənaətlə istifadə etməyə imkan yaradır.