Meta şirkəti süni intellekt şöbəsinin strukturunda əhəmiyyətli dəyişikliklər etdiyini elan edib. Bu addım, OpenAI, Anthropic və Google DeepMind kimi rəqiblərlə rəqabətdə geri qalmamaq məqsədilə atılıb. Yeni struktur çərçivəsində Meta Superintelligence Labs (MSL) adlı xüsusi bir platforma yaradılıb. Bu platforma dörd ixtisaslaşmış qrupa bölünüb və hər biri müəyyən bir sahədə fəaliyyət göstərəcək.

TBD Labs adlı qrup süni intellekt modellərinin hazırlanmasına cavabdeh olacaq. Scale AI-nin qurucusu Alexandr Wang bu qrupa rəhbərlik edəcək. TBD Labs, xüsusilə Llama seriyası modellərinin inkişafı üzərində çalışacaq. Xatırladaq ki, Llama modelinin son versiyası bu ilin aprel ayında təqdim edilmişdi. Digər üç qrup isə fundamental tədqiqatlar, süni intellektin məhsullara inteqrasiyası və infrastrukturun inkişafı sahələrində fəaliyyət göstərəcək.

Meta şirkətinin baş direktoru Mark Zuckerberg də yeni bölmələrin kadr seçimlərinə şəxsən qatılıb. Bu, süni intellektin Meta üçün strateji əhəmiyyətini bir daha vurğulayır. Qeyd edək ki, ötən həftə Meta-nın son altı ay ərzində dördüncü dəfə süni intellekt bölmələrinin strukturunda dəyişikliklər etməyi planlaşdırdığı açıqlanmışdı.