Microsoft korporasiyası Windows əməliyyat sistemi (ƏS) üçün dəstəklənən versiyalara təhlükəsizlik yenilənməsi təqdim edib. Day.Az-ın Lenta.ru-ya istinadən verdiyi məlumata görə, bu yenilənmə ZDNet nəşri tərəfindən diqqətə çatdırılıb. Yenilənmələr, ənənəvi olaraq Microsoft-un hər çərşənbə axşamı təqdim etdiyi "Patch Tuesday" adlı təhlükəsizlik yeniləmələri çərçivəsində yayımlanıb.

Mütəxəssislər və müstəqil ekspertlər tərəfindən ümumilikdə 107 zəiflik aşkar edilib, bunlardan 13-ü kritik statusa malikdir. Bu səbəbdən Microsoft istifadəçiləri cihazlarını təcili şəkildə yeniləməyə çağırıb. Yenilənmə Windows 10, Windows 11 və Windows Server üçün əlçatandır.

Xüsusilə, "CVE-2025-53779" adlı "sıfır gün" zəifliyi diqqətəlayiqdir. Bu zəifliklərə qarşı hələ müdafiə mexanizmləri hazırlanmayıb. Problem Windows Kerberos autentifikasiya sistemində aşkar edilib. Lakin bu zəiflikdən istifadə etmək üçün cinayətkarın fiziki olaraq kompüterə çıxışı olmalıdır.

Yeniləmənin mövcudluğunu yoxlamaq üçün istifadəçilərə "Parametrlər" bölməsinə keçərək "Windows Yeniləmə Mərkəzi"ni seçmələri tövsiyə olunur. Əgər yenilənmə görünmürsə, "Yeniləmələri yoxla" funksiyası vasitəsilə sorğu etmək mümkündür.