DroneShield Ltd şirkəti SentryCiv adlı, mülki sektor üçün nəzərdə tutulmuş müasir dron əleyhinə həllin istifadəyə verildiyini elan edib. Bu yeni sistem, icazəsiz və ya düşmən dronlarından gələn təhlükələrə qarşı kritik əhəmiyyətli infrastrukturun, ictimai məkanların və digər yüksək riskli obyektlərin effektiv və əlçatan müdafiəsini təmin etmək üçün hazırlanıb. SentryCiv sistemi radiotezlik siqnallarına əsaslanan və 150-dən çox dron modelini aşkar edə bilən passiv RFAI (Encrypted RF Threat Detection-RFAI) texnologiyasından istifadə edir, bu isə digər rabitə kanallarının işinə mane olmur.

Sistem hava limanlarının, enerji stansiyalarının, data mərkəzlərinin, stadionların, dövlət və islah müəssisələrinin qorunması üçün ideal hesab olunur. Süni intellekt texnologiyasından istifadə edərək, radiotezlik siqnallarını və digər məlumatları analiz edir, dron növlərini və onların operatorlarını müəyyən edir. Bu texnologiya təhlükələri erkən və dəqiq şəkildə aşkar etməyə imkan verir. SentryCiv-in əsas üstünlüklərindən biri abunəlik vasitəsilə mütəmadi olaraq yenilənən süni intellekt mühərrikindən istifadə etməsidir ki, bu da sistemin yeni dron modellərinə və dəyişən təhlükə taktikalarına uyğunlaşmasına imkan verir.

Operatorlar real vaxt rejimində prioritet bildirişlər alır, tam idarəetmə imkanı əldə edir və Sentry-C2 Civ platforması vasitəsilə xarici təhlükəsizlik sistemlərinə inteqrasiya funksiyasından yararlanırlar. Sistem mütəmadi yeniləmələrlə abunəlik modeli əsasında təqdim olunur, bu isə onu müxtəlif büdcə və tələblərə malik təşkilatlar üçün əlçatan edir. DroneShield şirkəti bildirib ki, onlar böyük kapital xərcləri tələb etməyən, digər sistemlərin işində fasilələr yaratmadan müdafiə səviyyəsini əhəmiyyətli dərəcədə artıran əlçatan bir həll təklif edirlər.