OnePlus şirkəti, orta büdcəli Nord CE5 modelinə əlavə olaraq, Nord 5 adlanan subflaqman smartfonunu təqdim edib. Yeni model xarici görünüş baxımından Nord CE5-ə bənzəsə də, bir sıra texniki üstünlükləri ilə seçilir. OnePlus Nord 5, 144 Hz təsvir yenilənməsinə malik, 2772x1240 piksel keyfiyyətli 6.83 düym ölçülü Swift AMOLED ekranla təchiz olunub. Ekranın maksimal parlaqlıq səviyyəsi 1800 nit təşkil edir və barmaq izi skanı texnologiyası birbaşa ekrana inteqrasiya edilib.

Smartfonun gövdəsi IP65 standartı üzrə tozdan və sudan qorunma xüsusiyyətinə malikdir. Cihaz, Snapdragon 8s Gen 3 prosessoru ilə işləyir və 8/12 GB RAM ilə 256/512 GB daxili yaddaş variantlarını təklif edir. Kamera baxımından, OnePlus Nord 5 modeli 50 MP və 8 MP-lik ikili arxa kameraya, həmçinin 50 MP ön kameraya sahibdir. Batareya tutumu 5200 mAh təşkil edir və cihaz 80 vatt gücündə sürətli şarj texnologiyasını dəstəkləyir. Hindistan bazarında isə 6800 mAh batareya ilə təchiz olunmuş xüsusi versiya təqdim ediləcək.

OnePlus Nord 5 artıq Avropada satışa çıxıb. Smartfonun başlanğıc qiyməti 449 avro olaraq müəyyən edilib. Yeni model, xüsusilə orta büdcəli smartfon axtaran istifadəçilər üçün cəlbedici bir seçim kimi qiymətləndirilir.