OnePlus şirkəti bu ilin əvvəlində təqdim etdiyi OnePlus Watch 3 ağıllı saatının yenilənmiş versiyasını təqdim edib. Yeni model OnePlus Watch 3 43 mm adlanır və əvvəlki versiyanın daha kompakt ölçülü alternativi kimi çıxış edir. Adından da bəlli olduğu kimi, bu yeni versiyanın gövdə ölçüsü 43 mm təşkil edir. Saatın gövdəsi paslanmaz poladdan hazırlanıb və IP68 və 5ATM standartlarına uyğun olaraq sudan qorunma xüsusiyyətinə malikdir.

OnePlus Watch 3 43 mm modeli 1.32 düym ölçülü AMOLED ekranla təchiz olunub. Ekran 466x466 piksel keyfiyyətə malikdir və maksimal parlaqlığı 1000 nit təşkil edir. Cihaz Snapdragon W5 Gen 1 prosessoru ilə işləyir, 2 GB RAM və 32 GB daxili yaddaş həcmi ilə təchiz olunub. Ağıllı saat ikili sistemdə (Google WearOS və RTOS) fəaliyyət göstərir. Bu sistem sayəsində cihaz adi istifadə rejimində 60 saat, enerjiyə qənaət rejimində isə 7 gün işləyə bilir.

OnePlus Watch 3 43 mm modeli 100-dən çox idman rejimini dəstəkləyir və sağlamlıq göstəricilərini monitorinq edə bilir. Saat ürək döyüntülərinin tezliyini, qandakı oksigen səviyyəsini ölçür, həmçinin yuxu keyfiyyətini və tənəffüs prosesini analiz edir. Bununla da, istifadəçilərə yuxu keyfiyyəti və tənəffüs göstəricilərini təyin etmək imkanı yaradır.

Cihaz, həmçinin Bluetooth 5.2, Wi-Fi 6 və NFC texnologiyalarını dəstəkləyir. Yeni OnePlus Watch 3 43 mm artıq satışa çıxıb və Avropa bazarında 299 avro qiyməti ilə təqdim olunur.