Populyar strim platforması Twitch-in Rusiyada fəaliyyətini tamamilə dayandıra biləcəyi ehtimal olunur. Bu barədə "İzvestiya" nəşri məlumat yayıb. Xəbərdə qeyd olunur ki, artıq Rusiyada FullHD və 4K (1080p və 1440p) keyfiyyətində yayımları izləmək və ya bu keyfiyyətdə yayımlar aparmaq mümkün deyil.

Platformanın nümayəndələri bu qərarı kommersiya baxımından bölgədə fəaliyyət göstərməyin məqsədəuyğun olmaması ilə izah ediblər. Twitch əvvəllər də digər ölkələrdə oxşar qərarlar verərək, sonradan həmin ölkələrdə fəaliyyətini tamamilə dayandırmışdı.

Rusiyanın Jurnalistlər İttifaqının katibi Yuliya Zaqitova bildirib ki, bu, Rusiyada Twitch istifadəçilərinin platformadan istifadə edərkən çətinliklərlə üzləşdiyi ilk hal deyil. Daha əvvəl platformanın rəhbərliyi monetizasiya ilə bağlı məhdudiyyətlər tətbiq etmişdi ki, bu da istifadəçilər üçün Twitch-dən gəlir əldə etməyi çətinləşdirmişdi.

Son günlərdə Rusiyadakı Twitch istifadəçiləri video yayımların keyfiyyətində məhdudiyyətlərlə qarşılaşıblar. Belə ki, yayımlar artıq maksimum 720p çözünürlükdə və 60 kadr/saniyə sürətində əlçatan olub.

Bundan əlavə, Rusiya mənşəli bir bloqer oyun zamanı "Z" hərfi ilə bağlı görüntülərə görə Twitch-də bloklanmışdı.