Kainatın Sirri: Qaranlıq Maddə və Enerji İllüziyadır?

Astronomlar uzun illərdir ki, kainatın yalnız 5 faizinin adi maddədən ibarət olduğunu, qalan 95 faizini isə qaranlıq maddə və qaranlıq enerjinin təşkil etdiyini iddia edirlər. Lakin Ottava Universitetindən fizika üzrə dosent Racendra Quptanın rəhbərlik etdiyi yeni araşdırma bu anlayışa meydan oxuyur. Araşdırma, kainatın davranışını izah etmək üçün qaranlıq maddə və enerjidən daha sadə bir izahın mümkün olduğunu irəli sürür.

Fundamental Güclərin Zəifləməsi Hipotezi

Qupta və onun komandası "Galaxies" jurnalında dərc olunan araşdırmada kainatın genişlənməsi ilə təbiətin əsas qüvvələrinin zamanla zəiflədiyini iddia edir. Quptanın sözlərinə görə: 'Kainat genişləndikcə, qüvvələr zəifləyir. Bu zəifləmə, qaranlıq enerjinin kainatı genişləndirdiyi illüziyasını yaradır. Eyni zamanda, qravitasiya qüvvələrinin dəyişimi qaranlıq maddə olaraq qəbul edilən əlavə cazibə qüvvəsini izah edir.'

Tək Bir Tənliklə İzah

Standart modeldə qaranlıq maddə və qaranlıq enerji kainatın müxtəlif miqyasda müşahidə olunan iki fərqli fenomenu izah etmək üçün istifadə olunur. Lakin Qupta və komandası, tək bir tənlik vasitəsilə həm qalaktikaların fırlanmasını, həm də cazibə obyektlərinin ətrafında işığın necə əyildiyini izah edə bilir. Onun nəzəriyyəsi, qaranlıq maddə və enerjiyə ehtiyac olmadan müşahidələri izah etməyə imkan verir.

Qupta deyir: 'Bu yanaşma ilə kainatdakı qalaktikaların hərəkətindən tutmuş işığın əyilməsinə qədər hər şeyi izah edə bilirik. Həqiqətən, hər şey yalnız təbiətin dəyişən sabitlərinin nəticəsidir.'

İnsanlıq Üçün Nə Deməkdir?

Quptanın nəzəriyyəsi yalnız nəzəriyyə deyil, həm də böyük suallara cavabdır. O qeyd edir ki, bu model, erkən kainatda qalaktikaların niyə bu qədər tez formalaşdığını və bu qədər böyük olduğunu daha yaxşı izah edir. 'Bəlkə də kainatın ən böyük sirləri sadəcə təbiətin dəyişən sabitlərinin oyunlarından yaranır,' deyə alim vurğulayır.

Bu nəzəriyyə, kainatın yaşını demək olar ki, ikiqat artıraraq qalaktikaların və qara dəliklərin formalaşması üçün daha çox vaxt təmin edir. Qupta əlavə edir: 'Bəzən ən sadə izah ən yaxşısıdır.'

Bu araşdırma kainatın sirlərinə yeni bir işıq salır və astronomiya və fizikanı kökündən dəyişə bilər.