Rus Coğrafiya Cəmiyyətinin (RCC) Qırğızıstanda təşkil etdiyi ekspedisiya İssık-Köl gölünün dibinin rəqəmsal relyef modelini, Semenov dərəsindəki kurqanların xəritəsini və sahil xəttinin ortofotoplanını hazırlayıb. Bu barədə cəmiyyətin mətbuat xidməti məlumat yayıb. Ekspedisiya, Rusiya prezidenti tərəfindən alim Pyotr Semenov Tyan-Şanskinin 200 illik yubileyinə həsr olunmuş tədbirlərin keçirilməsi ilə bağlı verilmiş göstəriş çərçivəsində təşkil olunub. Alimin yubileyi 2027-ci ildə qeyd ediləcək. Ekspedisiya çərçivəsində üç həftə ərzində seysmologiya, botanika, ekologiya və geologiya sahələrində araşdırmalar aparılıb. Əsas nəticələrdən biri İssık-Köl gölünün dibinin rəqəmsal relyef modelinin hazırlanması olub. İndi artıq ilkin nəticələr əldə olunub və bunlar gələcək araşdırmaların əsasını təşkil edəcək. Növbəti mövsümlərdə şəhərin su altında qalmasının səbəbləri araşdırılacaq, bölgənin seysmik vəziyyəti qiymətləndiriləcək və gölün ekoloji vəziyyətinin qorunması üçün tövsiyələr hazırlanacaq. Ekspedisiyanın elmi rəhbəri, Şmidt adına Yer Fizikası İnstitutunun nümayəndəsi Andrey Strelnikov bildirib ki, ekspedisiya həmçinin qədim zəlzələlərin izlərini - seysmitləri aşkar edib. Bu geoloji formalar süxurların, gil və qumların keçmişdə baş vermiş proseslər zamanı yaranmış izlərini ehtiva edir. Xüsusilə Semenov-Qriqoriyev dərəsində aşkar edilmiş seysmik çıxıntı alimlər üçün böyük maraq doğurur. Bu struktur dərənin formalaşması ilə bağlı əvvəlki fikirləri dəyişə bilər. Ekspedisiya çərçivəsində ağac nümunələri götürülərək dendroxronoloji tədqiqatlar aparılıb. Qədim zəlzələlərin bitki dünyasına təsirini araşdırmaq üçün on ağac nümunəsi seçilib. Geobotanika qrupu bölgənin flora müxtəlifliyini sənədləşdirərək yüzdən çox bitki növünü qeydə alıb. Onlardan on növ bu region üçün indiyədək qeydə alınmamış yeni növlərdir. Ekspedisiya rəhbərinin sözlərinə görə, bu herbariy nümunələri bölgənin botanika xəritəsini əhəmiyyətli dərəcədə zənginləşdirir. Alimlər həmçinin gölün ekoloji vəziyyətini araşdıraraq sahil zonasında, o cümlədən qollarında 15 plankton nümunəsi və mikroplastiklərin öyrənilməsi üçün 10 su nümunəsi götürüblər. RCC-nin məlumatına görə, ekspedisiya zamanı aparılmış araşdırmalar bölgənin seysmik tarixi və onun qədim yaşayış məntəqələrinə təsirini anlamaq baxımından mühüm əhəmiyyət kəsb edir. Gələcək araşdırmalar İssık-Köl gölündə su altında qalmış şəhərlərin yox olmasının səbəblərini daha dəqiq müəyyən etməyə kömək edəcək.