Rusiyanın Moskva Fizika-Texnika İnstitutunun (MFTİ) əməkdaşları yeni bir milli anten texnologiyası hazırlayıb və test ediblər. Bu anten, baza stansiyası ilə mobil telefonlar arasında məlumatların qəbul və ötürülməsini təmin edir. Yeni texnologiya sektor tipli antenlər sinfinə daxildir və müəyyən bir ərazidə bir neçə min abunəçiyə xidmət göstərmək üçün nəzərdə tutulub. Tamamilə yerli komponentlərdən hazırlanmış bu anten, 5G standartında işləyir.

Moskvanın VDNX ərazisində İnformasiya Texnologiyaları Departamentinin sınaq meydançasında anten vasitəsilə məlumat ötürmə sürəti 1 Gbit/s səviyyəsinə çatdırılıb. Bu, ənənəvi ev interneti sürətindən ən azı 10 dəfə çoxdur.

MFTİ-nin mobil rabitə perspektiv həllərinin tətbiqi araşdırmaları və inkişaf şöbəsinin rəhbəri Qriqori Seregin bildirib ki, "Bizim anten tamamilə rus komponentlərindən ibarətdir, hətta istifadə olunan vintlər və birləşdiricilər də daxildir. Yalnız rus materiallarından istifadə, cihazın hazırlanmasını və istehsalını çətinləşdirir. Lakin sınaq nəticələri göstərir ki, mobil rabitə şəbəkələrinin beşinci nəsli yerli texnologiyalar əsasında 1 Gbit/s sürətlə işləyə bilər. Bu isə kommersiya xidmətlərinin istifadəyə verilməsinə texnoloji hazır olduğumuzu sübut edir."

Teorik olaraq, 5G şəbəkələri 20 Gbit/s sürətinə qədər işləyə bilər, lakin hazırda praktikada bu imkanlar daha aşağıdır. Mütəxəssis saytların məlumatına görə, bu göstəricidə lider ölkələr Birləşmiş Ərəb Əmirlikləri, Qətər və Küveyt hesab olunur. Bu ölkələrdə istifadəçilər 539, 529 və 350 Mbit/s median sürətindən yararlana bilirlər. Cənubi Koreyada isə 5G şəbəkəsinin orta sürəti 456 Mbit/s, maksimal sürəti isə 925 Mbit/s təşkil edir. Rusiyada hazırlanan antenin imkanları isə bu lider ölkələrin səviyyəsinə yaxınlaşır.