Rusiyada Mobil İnternetin Bloklanması Qaydalarının Tənzimlənməsi Müzakirə Edilir

Rusiyanın Rəqəmsal İnkişaf Nazirliyi (MinTsifry) mobil internetin bloklanması ilə bağlı yeni qaydaların tətbiqini müzakirə edir. Bu təşəbbüs son zamanlar bu sahədə yaranan nizamsızlıq və artan dron hücumları səbəbindən gündəmə gəlib. Qeyd olunur ki, mobil internetin bağlanması ilə bağlı göstərişlər əvvəllər yalnız Roskomnadzor və hüquq-mühafizə orqanlarından gəlirdi. Lakin hazırda yerli icra hakimiyyətləri də mobil əlaqənin kəsilməsi ilə bağlı tələblər irəli sürür, bu isə mobil operatorların işini çətinləşdirir.

Məsələ ilə bağlı "İzvestiya" qəzetinə danışan mənbələr bildiriblər ki, hökumət və biznes nümayəndələri bu prosesin vahid dövlət qurumu tərəfindən tənzimlənməsini təklif edirlər. Bu qurum mobil internetin bağlanması və açılması ilə bağlı qərarları qəbul edəcək. Eyni zamanda, mobil operatorlara bu barədə məlumat verəcək xüsusi informasiya sistemi də yaradılması nəzərdə tutulur.

İnternet Araşdırmaları İnstitutunun direktoru Karen Kazaryan bildirir ki, bu cür mərkəzləşdirilmiş sistem həm şirkətlərin işini asanlaşdıracaq, həm də istifadəçiləri əsassız internet kəsintilərindən qoruyacaq. O, bu təşəbbüsün həm biznes, həm də istifadəçilər üçün faydalı olacağını vurğulayıb.

Qeyd edək ki, bundan əvvəl Nijni Novqorod vilayətinin qubernatoru Qleb Nikitin dron hücumlarının qarşısını almaq üçün mobil rabitə siqnallarının zəiflədilməsi tədbirlərinin görüldüyünü açıqlamışdı.