Rusiyada avtomobil sənayesi üçün sənaye robototexnikası məhsullarının hazırlanması, sınaqdan keçirilməsi və inkişaf etdirilməsi üzrə fəaliyyət göstərəcək yeni mərkəz yaradılacaq. Bu haqda "Element" şirkətlər qrupuna daxil olan Robotlar Korporasiyası, "KamAZ" və "Eydos Robototexnika" arasında əldə olunan razılaşmada qeyd olunub. Məlumatı "Element"in mətbuat xidməti yayıb.

Razılaşma sənədi "İnnaprom-2025" beynəlxalq sənaye sərgisi çərçivəsində imzalanıb. Sənədə Robotlar Korporasiyasının baş direktoru Aleksandr Alekseyev, "KamAZ"ın kadrların idarə olunması, təşkilati inkişaf və korporativ idarəetmə üzrə baş direktor müavini Janna Xaliullina və "Eydos Robototexnika"nın baş direktoru Anton Suryaninov imza atıblar.

"Razılaşma tərəflərin avtomobil sənayesində avtomatlaşdırma prosesini stimullaşdırmaq üçün sənaye robototexnikası məhsullarının hazırlanması, sınaqdan keçirilməsi və inkişaf etdirilməsi məqsədilə Robototexnika İnkişaf Mərkəzinin yaradılmasına dair niyyətlərini ifadə edir", - deyə məlumatda bildirilir.

Yeni mərkəzin prioritet layihələri arasında perspektivli və kommersiya baxımından uğurlu robototexnika texnologiyalarının yaradılması, sənaye robotlarının avtomobil istehsalında tətbiq imkanlarının genişləndirilməsi və robototexnika sahəsində perspektivli inkişafların həm Rusiya, həm də xarici bazarlarda tanıdılması yer alır.

Qeyd edək ki, "İnnaprom-2025" sərgisi 7-10 iyul tarixlərində Yekaterinburqda keçirilir. Tədbirin əsas mövzusu "Texnoloji Liderlik: Sənaye Sıçrayışı"dır. Sərginin tərəfdaş ölkəsi Səudiyyə Ərəbistanıdır. Tədbir çərçivəsində Rusiya biznes nümayəndələri 37 ölkədəki Rusiya ticarət nümayəndələri ilə əlaqə görüşləri keçirəcəklər.

"TASS" informasiya agentliyi sərginin baş informasiya tərəfdaşıdır.