Samsung şirkəti Galaxy S25 FE smartfonunu gözlənildiyindən daha tez təqdim etməyə hazırlaşır. Bu barədə Samsung Mobile Experience bölməsinin direktoru gözlənilən gəlirlərlə bağlı keçirilən iclasda məlumat verib. Məlumata görə, cihaz yaxın iki ay ərzində təqdim olunacaq.

Galaxy S25 FE modeli Exynos 2400 prosessoru, 8 GB RAM, 128 GB daxili yaddaş həcmi ilə təchiz olunacaq və 45 vatt gücündə sürətli şarj texnologiyasını dəstəkləyəcək. Bu erkən təqdimatın əsas səbəbi Samsung-un ilin sonuna yaxın rəqabəti gücləndirmək və orta seqmentdəki məhsul çeşidini artırmaq istəyidir.

Bununla yanaşı, başqa mümkün səbəb kimi payız-qış mövsümündə planlaşdırılan digər səs-küylü təqdimatlar göstərilir. Bu təqdimatlar arasında Galaxy Tab S11 Ultra flaqman planşeti, XR cihazı və üçqat qatlana bilən smartfon yer alır. Şirkət bu cihazların təqdimatlarını bir-birindən ayırmağa çalışır ki, onların hər biri informasiya məkanında öz yerini tuta bilsin və diqqətdən kənarda qalmasın.