Cənubi Koreya texnologiya nəhəngi Samsung, 9 iyul tarixində üç yeni qatlanan smartfon modeli və yenilənmiş ağıllı saat seriyasını təqdim etdi. Tədbir zamanı Galaxy Z Fold 7, Galaxy Z Flip 7 və Galaxy Z Flip 7 FE modelləri ictimaiyyətə təqdim olundu.

Galaxy Z Fold 7 kitab kimi qatlanan dizaynı ilə seçilir. Telefon qapalı vəziyyətdə cəmi 8.9 mm, açıq halda isə 4.2 mm qalınlığa malikdir. Əvvəlki modeldən daha yüngül olan cihazın çəkisi 215 qramdır. Xarici ekranı 6.5 düym, əsas ekranı isə 8 düym ölçüsündədir. Kamera baxımından, cihaz 200 meqapiksellik əsas obyektiv, 10 meqapiksellik teleobyektiv, 12 meqapiksellik ultra-geniş obyektiv və həm xarici, həm də əsas ekranda yerləşən iki 10 meqapiksellik ön kameralarla təchiz olunub. 4400 mAh batareyası ilə təchiz olunan cihaz, 24 saat fasiləsiz video oynatma qabiliyyətinə malikdir. Galaxy Z Fold 7-nin Böyük Britaniyada başlanğıc qiyməti 1799 funt sterlinq (təxminən 2434 ABŞ dolları) təşkil edir.

Galaxy Z Flip 7 isə klassik "qatlanan" dizaynı ilə təqdim edilib. Bu model açıq vəziyyətdə 6.5 mm qalınlığa malikdir. Xarici ekranı 4.1 düym, əsas ekranı isə 6.9 düym ölçüsündədir. Kamera xüsusiyyətlərinə gəldikdə, 50 meqapiksellik əsas kamera, 12 meqapiksellik ultra-geniş sensor və 10 meqapiksellik ön obyektiv cihazın əsas üstünlüklərindəndir. 4300 mAh-lik batareyası ilə cihaz, 31 saat fasiləsiz video oynatmağı təmin edir. Galaxy Z Flip 7-nin qiyməti Böyük Britaniyada 1049 funt sterlinqdən başlayır. Daha sərfəli alternativ olaraq təqdim edilən Galaxy Z Flip 7 FE modeli isə bir qədər kiçik və qalın dizayna malikdir. Onun başlanğıc qiyməti 849 funt sterlinqdir.

Bundan əlavə, Samsung yeni nəsil ağıllı saatlarını da təqdim edib. Galaxy Watch 8 və Galaxy Watch 8 Classic modelləri Google Wear OS 6 əməliyyat sistemi və süni intellekt funksiyaları ilə təchiz olunub. Saatlara daxil edilmiş Gemini AI adlı çat-bot səsi və ya düymə ilə aktivləşdirilə bilir. Yeni modellər daha incə dizayn, artırılmış batareya ömrü və daha parlaq ekranlar kimi xüsusiyyətlərlə təkmilləşdirilib. Galaxy Watch 8-in qiyməti 350 ABŞ dolları, Classic modelinin qiyməti isə 500 ABŞ dollarıdır.

Bütün yeni cihazlar 9 iyul tarixindən etibarən əvvəlcədən sifariş üçün əlçatan olub və onların satışa çıxarılması 25 iyul tarixinə planlaşdırılıb.