Avropa avtomobil nəhəngi Stellantis NV, 2026-cı ildən etibarən hidrogen yanacaq elementlərinin istehsalı ilə məşğul olan Symbio adlı birgə müəssisəyə investisiyaları dayandırmağı planlaşdırır. Bu barədə Michelin və Forvia şirkətləri Bloomberg-ə verdikləri açıqlamada bildiriblər. Forvia-nın bəyanatında deyilir: 'Forvia, Stellantis-in Symbio da daxil olmaqla, hidrogen biznesinə investisiyaları dayandırmaq niyyətində olduğunu təsdiqləyir. Bu addım Symbio-nun gələcəyi üçün ciddi və dərhal təsir edəcək əməliyyat və maliyyə nəticələrinə səbəb olacaq.' Stellantis, Symbio-dakı 33% payını 2022-ci ilin sonunda əldə etmişdi. Şirkət öz hidrogen yanacaqlı yük maşınlarında Symbio məhsullarından istifadə edir. Fransada yerləşən bu müəssisədə təxminən 650 nəfər çalışır. Stellantis-in səhmləri Milan birjasında çərşənbə axşamı 1% bahalaşıb. Bununla belə, ilin əvvəlindən bəri avtomobil nəhənginin bazar dəyəri üçdə bir azalaraq 31,6 milyard avroya düşüb.