Apple şirkətinin hazırladığı süpernazik iPhone 17 Air modeli daha az güclü qrafik prosessorla təchiz ediləcək. Bu barədə MacRumors portalı, Fixed Focus Digital adlı insayderə istinadən məlumat yayıb. Day.Az isə bu xəbəri Gazeta.ru-ya istinadən təqdim edib.

Sızdırılan məlumatlara görə, yeni iPhone 17 Air modeli Apple A19 Pro çipi ilə təchiz ediləcək. Lakin bu çipin qrafik prosessoru 5 nüvədən ibarət olacaq, halbuki Apple A19 Pro çipinin tam versiyası 6 nüvəli qrafik prosessorla gəlir. Daha güclü versiya iPhone 17 Pro və 17 Pro Max modellərində istifadə ediləcək.

Ekspertlər hesab edir ki, qrafik nüvələrin sayının azaldılması daha nazik korpusda istilik yayılmasının məhdudlaşdırılması zərurəti ilə bağlı ola bilər. Bununla belə, mütəxəssislər qeyd edirlər ki, əksər istifadəçilər adi istifadə ssenarilərində performans fərqini hiss etməyəcəklər.

Bu məlumatlar TF Securities analitiki Min-Çi Kuo-nun proqnozları ilə ziddiyyət təşkil edir. Kuo daha öncə iPhone 17 Air modelinin Apple A19 çipi ilə təchiz ediləcəyini, bu çipin isə standart iPhone 17 modelində istifadə olunacağını bildirmişdi. Digər analitik, Ceff Pu isə bu modelə Apple A18 çipinin quraşdırılacağını, bunun isə iPhone 16-nın standart versiyasında istifadə edildiyini iddia etmişdi.

Sözügedən iPhone 17 seriyası və digər Apple yeniliklərinin təqdimatının 9 sentyabr tarixində keçiriləcəyi barədə şayiələr var.