Tarixdə ilk dəfə: Çin markası BYD Formula 1-də yarışacaq!

Çinli avtomobil istehsalçısı Byd Formula 1-ə daxil olmağı planlaşdırır. Bloomberg-in məlumatına görə, şirkət qlobal səviyyədə öz imicini gücləndirmək və yeni texnologiyalarını yarış şəraitində sınamaq məqsədilə monopostlarda iştirak etmək niyyətindədir. Bu, Çin mənşəli bir markanın Formula 1-də ilk dəfə iştirakı olacaq. Hazırda Çin Xalq Respublikasından yeganə Formula 1 pilotu Zhou Guanyu 2022-2024-cü illərdə Alfa Romeo/Sauber komandasında əsas sürücü kimi çıxış edib, 2025-ci ildə isə Ferrari-nin ehtiyat sürücüsü olub.

2026-cı ildən qüvvəyə minəcək yeni texniki qaydalar monopostların daha çox elektrikləşdirilməsini tələb edir ki, bu da batareya istehsalçısı kimi Byd üçün böyük üstünlükdür. Şirkət artıq Tesla-dan daha çox elektrikli avtomobil satışı ilə dünya bazarında öncül mövqedədir.

FIA prezidenti Mohammed Ben Sulayem yeni komandaların yarışa qoşulmasına maraq göstərir və Formula 1-də 12 komandalı qrupun formalaşmasını arzulayır. Byd yalnız Formula 1-də deyil, həmçinin 24 Saat Le Mans kimi prestijli WEC yarışlarında da iştirak etməyi planlaşdırır. Şirkət ya öz komandası ilə, ya da mövcud komandaları satın almaqla motorsporta daxil ola bilər.

Byd-in Formula 1-ə girişi Çin avtomobil sənayesinin beynəlxalq arenada mövqeyini gücləndirəcək və qlobal motorsportda yeni rəqabət və innovasiyaların yaranmasına səbəb olacaq.