Tesla şirkəti 2025-ci ilin ikinci rübü üzrə çatdırılma göstəricilərini açıqlayıb və bu hesabatda Cybertruck elektrik pikapına olan tələbatın azalmağa davam etdiyini təsdiqləyib. Şirkətin təqdim etdiyi məlumatlara əsasən, hazırda Cybertruck-ın rüblük satışı təxminən 5000 ədədə qədər azalıb. Halbuki əvvəllər bu modelin istehsal həcminin 10 qat daha çox olması planlaşdırılırdı. Tesla-nın hesabatında qeyd olunur ki, 2025-ci ilin ikinci rübündə digər modellər kateqoriyasına daxil olan 13 409 ədəd elektromobil istehsal edilib. Bu kateqoriyaya Model S, Model X, Cybertruck və Semi yük elektromobilləri daxildir. Lakin bunlardan yalnız 10 394 ədədi müştərilərə çatdırılıb. Bu göstərici 2024-cü ildəki pik səviyyənin yarısından da azdır. Həmin dövrdə şirkət hələ də əvvəlcədən verilmiş Cybertruck sifarişlərini yerinə yetirirdi.

Əvvəllər Cybertruck-ın illik istehsal həcminin 250 000 ədəd olması planlaşdırılsa da, hazırkı vəziyyət fərqlidir. İllik istehsal göstəricisi 20 000-ə qədər azalıb. Buna baxmayaraq, Tesla alıcı marağını artırmaq üçün stimullaşdırıcı tədbirlər görüb. Şirkət ABŞ-da 7500 dollar məbləğində vergi güzəşti təqdim edir. Lakin Electrek nəşrinin yazdığına görə, bu addım belə alıcı marağını geri qaytarmağa kifayət etməyib. Qeyd edilməlidir ki, digər modellər kateqoriyasına daxil olan elektromobillərin hazırkı satış səviyyəsi hətta 2023-cü ilin birinci rübündəkindən də aşağıdır. Həmin dövrdə Cybertruck hələ bu kateqoriyaya daxil edilməmişdi.

Analitiklərin qiymətləndirmələrinə görə, bu çatdırılmaların təxminən yarısı Model S və Model X modellərinə aiddir. Semi modelinin hələ kütləvi istehsal olunmadığını nəzərə alsaq, qalan yarısı təxminən Cybertruck-ın payına düşür. Diqqət çəkən məqam odur ki, rəqib şirkətlərin elektrik pikap modelləri daha yüksək satış göstəricilərinə nail olublar. 2025-ci ilin ikinci rübündə Ford şirkəti ötən illə müqayisədə satışları 26% azalsa da, 5842 ədəd elektrikli F-150 Lightning modelini sata bilib. General Motors (GM) da ümumi elektrik pikap çatdırılmaları üzrə Tesla-nı geridə qoyub. GM 3056 ədəd Silverado EV, 1524 ədəd GMC Sierra EV və 4508 ədəd Hummer EV (buraya off-road versiyaları da daxildir) çatdırıb. Şirkətlərin nümayəndələri bu göstəriciləri açıqlayıblar, lakin GM hansı hissənin məhz pikaplara aid olduğunu dəqiqləşdirməyib.