Çinin Hainan əyalətində yerləşən Vınçan Kosmik Buraxılış Mərkəzindən Tianzhou 9 yük gəmisi çərşənbə axşamı səhər saatlarında uğurla kosmosa göndərildi. Bu, bu il Çinin Tienqonq kosmik stansiyasına edilən yeganə yük missiyasıdır.

Tianzhou 9 yük gəmisi Long March 7 Y10 raketi ilə birlikdə səhər saat 5:34-də Hainanın cənub-şərq sahillərində yerləşən buraxılış qülləsindən start götürdü. Çin İnsanlı Kosmik Agentliyinin verdiyi məlumata görə, qısa uçuşdan sonra raket yük gəmisini əvvəlcədən təyin edilmiş aşağı Yer orbitinə yerləşdirib və gəminin günəş panelləri açılaraq buraxılış əməliyyatının uğurla başa çatdığını təsdiqləyib. Təxminən üç saat sonra kosmik gəmi Tienqonq stansiyasının Tianhe əsas moduluna qoşulub.

Tienqonq stansiyasına qoşulan 17-ci, Tianzhou seriyasının isə səkkizinci yük gəmisi olan Tianzhou 9, Şençjou XX missiyasının astronavtları üçün yanacaq, elmi avadanlıqlar və zəruri ləvazimatlar çatdırmaqla vəzifələndirilib. Şençjou XX astronavtları orbitdə təxminən üç aydır ki, fəaliyyət göstərir və onların yerinə keçəcək Şençjou XXI heyətinin bu qış fəzaya göndərilməsi planlaşdırılır.

Pekin şəhərindəki Çin Kosmik Texnologiyaları Akademiyası tərəfindən dizayn və istehsal edilən Tianzhou 9 yük gəmisi, seriyanın əvvəlki modelləri kimi, dünyada ən böyük daşıma qabiliyyətinə və ən yüksək nəqliyyat səmərəliliyinə malikdir. Missiya planlayıcılarının bildirdiyinə görə, gəmi ümumi çəkisi təxminən 6,5 ton olan yüzlərlə paket, o cümlədən elmi və texnoloji cihazlar, habelə iki yeni kosmos gəzintisi kostyumu daşıyır.

Yer səthindən təxminən 400 kilometr yüksəklikdə orbitdə yerləşən Tienqonq hazırda müstəqil şəkildə bir millət tərəfindən idarə edilən yeganə kosmik stansiyadır. Bu nəhəng stansiya üç daimi hissədən — əsas moduldan və iki elmi kapsuldan ibarətdir. Stansiya müntəzəm olaraq heyət və yük gəmiləri ilə təchiz edilir.