Apple-ın baş direktoru Tim Kuk, şirkətin nadir korporativ toplantılarından birində çıxış edərək süni intellektin (İİ) müstəsna əhəmiyyətini vurğulayıb və bu sahədə inqilabi həllərin inkişaf etdirilməsinə çağırış edib. Bloomberg-in məlumatına görə, Kuk İİ sahəsindəki inqilabı internetin, smartfonların, bulud hesablama texnologiyalarının və tətbiqlərin yaranması ilə müqayisə edərək, hətta onlardan daha böyük olduğunu bildirib.

"Apple bunu etməlidir. Apple bunu edəcək. Bu, bizim əlimizdə olan bir məsələdir," - deyə Tim Kuk açıqlamasında bildirib və İİ texnologiyalarının inkişafına böyük investisiyalar qoyulacağını vəd edib.

O, həmçinin qeyd edib ki, Apple nadir hallarda fərdi kompüterlər, smartfonlar, planşetlər və MP3 pleyerlər kimi kateqoriyalarda birinci olub, lakin həmişə bu məhsulların ən yaxşı versiyalarını hazırlayıb. Tim Kuk, Apple-dan İİ sahəsində də oxşar bir sıçrayış gözlədiyini ifadə edib.

Toplantıda Apple-ın proqram təminatı üzrə rəhbəri Kreyq Federiqi də çıxış edib və İİ əsaslı Siri yeniləməsi ilə bağlı gecikmələrin səbəblərini izah edib. Əvvəlcə Apple, sistemin bir hissəsinin cihazlarda yerli olaraq, digər hissəsinin isə uzaq serverlərdə işləyəcəyi hibrid bir memarlıq yaratmaq istəyirdi. Ancaq Federiqinin sözlərinə görə, "bu yanaşma Apple keyfiyyətini təmin edə bilməz." İndi şirkət Siri üçün monolit bir memarlıq üzərində işləyir.