Cənub Federal Universitetinin (CFU) alimləri torpağın təmizlənməsi üçün yeni texnologiya hazırlayıblar. Bu metod, çirkab sularının çöküntülərindən istifadə etməklə torpaqdakı təhlükəli maddələrin miqdarını demək olar ki, yarıya (48%) endirir və eyni zamanda onun məhsuldarlıq qabiliyyətini artırır. Universitetin mətbuat xidmətinin verdiyi məlumata görə, bu texnologiya həm toksik elementləri torpaqdan təmizləməyə, həm də ətraf mühiti çirkləndirən çirkab sularından xilas olmağa imkan verir.

Texnologiya, çirkab sularının çöküntülərini aşağı temperaturlu piroliz prosesindən keçirərək sorbentə çevrilməsi əsasında qurulub. Bu sorbentin tətbiqi yalnız torpağın toksik maddələrdən təmizlənməsinə deyil, eyni zamanda onun su saxlama qabiliyyətini və qida tərkibini yaxşılaşdırmağa imkan verir. Alimlərin fikrincə, bu metod xüsusilə quraq bölgələrdə məhsuldarlığı 10-15% artırmağa kömək edə bilər.

Laboratoriya rəhbəri Svetlana Suşkova, bu texnologiyanın praktik əhəmiyyətinin geniş olduğunu vurğulayıb: "Birinci növbədə, biz çirklənmiş torpaqları təmizləyirik, dolayısı ilə kənd təsərrüfatı məhsullarının keyfiyyətini yaxşılaşdırırıq. İkincisi, sorbentlər tullantılardan hazırlanır ki, bu da özlüyündə böyük ekoloji problem yaradır."

Onun sözlərinə görə, oxşar texnologiyalar xaricdə mövcuddur, lakin CFU-nun hazırladığı metod xüsusilə Rusiya şəraitinə uyğunlaşdırılıb. Universitet alimləri yerli tullantılarla işləyir və uyğun məhsul əldə edirlər.

CFU-nun tədqiqatçılarının hesablamalarına görə, dünyada hər il təxminən 200 milyard ton çirkab su yaranır ki, bu da ağır metallar və patogenlər ehtiva edir. Yeni texnologiya bu tullantıların ekologiyaya minimal zərər verməklə utilizasiyasını təmin edir. CFU alimləri gələcəkdə bu texnologiyanı müvafiq dövlət qurumları və sənaye tərəfdaşları ilə əməkdaşlıq çərçivəsində tətbiq etməyi planlaşdırırlar. Tədqiqat "Prioritet-2030" proqramı çərçivəsində həyata keçirilib və onun nəticələri "Environmental Research" jurnalında dərc olunub.