Türkiyənin texnologiya sahəsində fəaliyyət göstərən startapı Fal, Seriya C investisiya raundunu uğurla tamamlayaraq 125 milyon dollar investisiya cəlb edib. Şirkət bu mərhələdə 1,5 milyard dollar dəyərində qiymətləndirilib və bununla da "Unicorn" statusu qazanan şirkətlər sırasına daxil olub.

İnvestisiya raunduna Meritech Capital rəhbərlik edib. Bu raundda Salesforce Ventures, Shopify Ventures, Google AI Futures Fund və əvvəlki mərhələlərdə sərmayə qoymuş Andreessen Horowitz (a16z), Bessemer Venture Partners, Kindred Ventures, Notable Capital, First Round Capital, Unusual Ventures və Village Global kimi tanınmış investorlar iştirak ediblər.

Fal-ın təsisçisi və icraçı direktoru Burkay Gür, bu raundun uğurla tamamlanmasını qlobal investisiya fondlarının şirkətə olan etimadının göstəricisi kimi qiymətləndirib. O bildirib ki, "Fal" fərdiləşdirilmiş və real vaxtda istehsal olunan media məhsullarının brendlər və şirkətlər üçün nə qədər əhəmiyyətli olduğunu bir daha sübut edir. Gür əlavə edib ki, "Fal" yaradıcı komandaların texniki maneələr və istehsalat çətinlikləri ilə üzləşmədən öz təsəvvürlərinə uyğun məhsullar yaratmalarına imkan yaradan əsas texnoloji platformadır.

Şirkət nümayəndələri bildiriblər ki, yeni cəlb olunan investisiyalar şirkətin infrastrukturunun inkişaf etdirilməsinə, yeni işçilərin cəlb olunmasına və yaradıcı media sahəsində əsas texnologiyaların inkişafına yönəldiləcək.

Fal nədir?

2021-ci ildə Burkay Gür və Görkəm Yurtseven tərəfindən təsis olunan "Fal", səs, şəkil və video istehsalı üçün müxtəlif süni intellekt modellərini bir araya gətirən qlobal miqyasda ən iri platformalardan biridir. İstifadəçilər, o cümlədən Google-un ən son video modeli "Veo 3" də daxil olmaqla, onlarla açıq və qapalı mənbəli süni intellekt modelinə API vasitəsilə asanlıqla çıxış əldə edə bilirlər.

Fal platforması 2,5 saniyəlik flux çıxarış sürəti ilə rəqiblərinə nisbətən iki dəfə daha sürətli nəticə verir. Hazırda "Fal" dünya üzrə 100-dən çox tanınmış korporativ müştəri, o cümlədən Quora, Canva, Perplexity, Shopify, Moonvalley, Foster + Partners və Play AI ilə əməkdaşlıq edir. Platformada 1 milyondan artıq istifadəçi qeydiyyatdadır və hər ay milyonlarla süni intellekt tərəfindən yaradılmış vizual material təqdim olunur. Artan tələbat fonunda şirkətin gəliri son iki ayda 50 faizdən çox artıb.