Çin şirkəti Unitree Robotics dünyada ilk insanabənzər robotlardan biri olan R1 modelinin satışına başladığını rəsmən elan edib. Bu modelin ilkin satış qiyməti 39.900 yuandan (təxminən 5900 ABŞ dolları) başlayır və bu qiymət digər ölkələrdən olan rəqiblərlə müqayisədə xeyli ucuzdur. Şirkətin təqdimat videosunda R1 robotunun çəkisinin 25 kiloqram olduğu və konstruksiyasında 26 oynaqlı birləşmənin istifadə olunduğu vurğulanıb. Robotun proqram təminatının əsasını multimodal dil modeli təşkil edir, bu isə ona həm səsli əmrləri, həm də vizual görüntüləri tanıma qabiliyyəti verir.

R1-in nisbətən əlverişli qiyməti Çin startaplarının texnologiya sahəsində ABŞ rəqiblərini qabaqlamaq iddiasını nümayiş etdirir. Unitree şirkəti, xüsusilə bu ilin fevral ayında məşhurlaşdı. Şirkətin baş direktoru Wang Xingxing həmin vaxt Çin Xalq Respublikasının Sədri Xi Jinping ilə keçirilən görüşdə iştirak etmişdi. Görüşdə həmçinin Alibaba-nın qurucusu Jack Ma və Tencent-in baş direktoru Pony Ma da yer almışdı.

R1 robotunun təqdimatı Şanxayda keçiriləcək Çinin süni intellekt üzrə ən böyük forumu ilə eyni vaxta təsadüf edir. Tədbir çərçivəsində texnologiya şirkətlərinin nümayəndələri, hökumət rəsmiləri və vençur investorlar süni intellektin inkişafı ilə bağlı müzakirələr aparacaq. Ümumdünya Süni İntellekt Konfransında bu sahədə Çinin strategiyasına rəhbərlik edəcək əsas fiqurlar toplanacaq. Forumda, xüsusilə süni intellektə sahib insanabənzər robotların yaradılması istiqamətindəki inkişaflar müzakirə ediləcək.

Boston Dynamics kimi ABŞ şirkətləri uzun müddət bu sahədə üstünlük təşkil etsələr də, hazırda Çin şirkətləri sürətli irəliləyişlər göstərir. Bu robotlar zavodlarda, gündəlik məişət işlərində və hərbi məqsədlər üçün istifadə oluna bilər. Çin şirkətləri tərəfindən təqdim edilən modellərin yayılma sürətinə təsir edən əsas amillərdən biri də qiymət siyasətidir. Unitree-nin əvvəlki modeli olan G1 robotu əsasən tədqiqat laboratoriyalarında və məktəblərdə istifadə olunurdu, lakin onun qiyməti 16.000 ABŞ dolları idi. Daha iri ölçülü və inkişaf etmiş H1 modelinin qiyməti isə 90.000 ABŞ dollarından başlayır.

Unitree-nin yerli rəqiblərindən biri olan UBTech Robotics Corp. bu il ərzində insanabənzər robot təqdim edəcəyini və onun qiymətinin 20.000 ABŞ dolları olacağını bəyan edib. Bu robot ev işlərində köməkçi ola bilər və şirkət onu zavodlarda istifadəyə yararlı hala gətirməyi planlaşdırır.