Voyager-1 kosmik aparatı, 300 ildən sonra hələ sübut edilməmiş, lakin alimlərin mövcud olduğuna əmin olduqları fərziyyəvi kosmik bölgəyə çatacaq. 1977-ci ildə buraxılan bu aparat, hazırda Yerdən təxminən 167 astronomik vahid (Yer ilə Günəş arasındakı məsafəyə bərabər) uzaqlıqda yerləşir. Voyager-1, Günəş sistemindən çıxaraq heliosferanı tərk edən, heliopauza sərhədini keçən və ulduzlararası məkana daxil olan ilk insan tərəfindən hazırlanmış obyekt olub. Hazırda Yerdən göndərilən siqnalın aparata çatması üçün 23 saat 12 dəqiqə vaxt tələb olunur. Bir ildən az müddət sonra bu vaxt tam olaraq 24 saat olacaq və beləliklə, Voyager-1 Yer kürəsindən tam bir işıq sutkası məsafəsinə çatmış ilk süni aparat olacaq. Missiya artıq uzun müddətdir ki, başa çatmış hesab olunur və yanacaq ehtiyatlarının 2030-cu illərdə tam tükənəcəyi gözlənilir. Lakin onun səyahəti faktiki olaraq yenicə başlayır. 40 000 ildən sonra Voyager-1, AC +79 3888 ulduzuna Günəşimizdən daha yaxın olacaq. Lakin bu qarşılaşmadan əvvəl aparat Oort buludunu keçməli olacaq. Bu, əsasən asteroidlərdən və kometalardan ibarət olan, Günəş sistemimizi əhatə edən fərziyyəvi sferik bir sahədir. NASA alimləri bildirir ki, Oort buludu Günəş sisteminin cazibə sərhədini müəyyən edən bir hüduddur. Qısa dövrlü kometalar Oort buludunun daxili hissəsindən qaynaqlana bilər, uzun dövrlü kometalar isə çox güman ki, buludun xarici hissəsindən gəlir. Astronomların hesablamalarına görə, Oort buludunun daxili sərhədi Günəşdən təxminən 2000-5000 astronomik vahid uzaqlıqdan başlayır. Voyager-1-in bu bölgəyə çatması təxminən 300 il çəkəcək və onun bu sərhədləri aşması isə 30 000 ilə qədər vaxt aparacaq. Əgər Voyager-1 Oort buludunu keçə bilsə və heç bir asteroid və ya kometa ilə toqquşmasa, o, kosmosda hələ uzun illər səyahət edə bilər. Alimlər maraqlanırlar ki, aparatın üzərində yadplanetli həyat üçün göndərilən "Qızıl lövhələr" nə qədər müddət qoruna bilər. Bu lövhələrin yazılarının keyfiyyəti ulduzlararası maddənin təsiri altında pisləşə bilər. NASA-nın proqnozlarına görə, 5 milyard illik səyahətdən sonra Voyager-1-in lövhələrinin xarici səthi oxunmaz hala gələcək. Lövhələrin daxili səthi isə Süd Yolu qalaktikasının Andromeda qalaktikası ilə birləşəcəyi vaxta qədər qorunub qala bilər. Bu birləşmə təxminən 5 milyard il sonra baş verəcək. Bundan sonra Voyager-1 qalaktikalararası məkana atıla bilər ki, burada onun dağılma sürəti daha da azalacaq.