WhatsApp messencer xidməti istifadəçiləri fırıldaqçı qrup söhbətlərindən qorumaq üçün yeni təhlükəsizlik funksiyası təqdim edəcəyini açıqlayıb. Bu yenilik, xüsusilə istifadəçilərin qeyri-tanış şəxslərdən gələn qrup dəvətləri zamanı daha diqqətli olmalarını təmin edəcək.

Yeni təhlükəsizlik funksiyası çərçivəsində, istifadəçilər qrup dəvəti aldıqda, həmin dəvət haqqında ətraflı məlumat əldə edəcək. Bu məlumatlar qrupun yaradılma tarixi, dəvət göndərənin adı, qrup üzvlərinin sayı və həmin üzvlərdən neçə nəfərin istifadəçinin kontakt siyahısında olduğu kimi detallarını əhatə edəcək. Bundan əlavə, şəxsi məlumatların paylaşılması ilə bağlı xəbərdarlıqlar və qrup dəvətlərini necə məhdudlaşdırmaq barədə təlimatlar da təqdim ediləcək.

İstifadəçilərə iki seçim təklif olunacaq: ya qrupu dərhal tərk etmək, ya da qrupa baxış keçirmək. Qrupa baxış keçirdikdən sonra belə, istifadəçi qrupa tam olaraq qoşulmağı təsdiqləməyincə, qrup bildirişləri səssiz qalacaq. Bu, istifadəçilərin qərar vermədən əvvəl təhlükəsizlik baxımından daha çox məlumat əldə etməsinə imkan yaradacaq.

Meta şirkətinin WhatsApp xidmətində bu yeniliyi tətbiq etmək qərarı, son illər artan fırıldaqçılıq halları ilə bağlıdır. Xüsusilə, "cazibədar iş təklifləri" və ya "gəlirli maliyyə yatırımları" adı altında istifadəçiləri aldatmağa çalışan şəxslər müxtəlif üsullardan istifadə edirlər. Hətta bəzən qurbanların etibarını qazanmaq üçün kiçik məbləğdə pullar da əvvəlcədən köçürülür. WhatsApp istifadəçilərə bu cür hallarda diqqətli olmağı və şübhəli vəziyyətlərdə qrupdan dərhal çıxmağı məsləhət görür.

Eyni zamanda, WhatsApp istifadəçilərinə tövsiyə edir ki, əgər fırıldaqçılığın qurbanı olublarsa, müvafiq qrup söhbətinin ekran görüntülərini saxlamaq və hüquq-mühafizə orqanlarına müraciət etmək vacibdir.

Yeni təhlükəsizlik funksiyasının konkret olaraq hansı tarixdə istifadəyə veriləcəyi barədə Meta şirkəti hələlik dəqiq məlumat paylaşmayıb.